ۋنيۆەرسيتەتتىڭ 1948 -جىلعى تۇلەگى - بۇگىنگى اكادەميكپەن كەزدەسۋ ءوتتى - قىزىلوردا - فوتو

قىزىلوردا. قازاقپارات - قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ ستۋدەنتتەر سارايىندا ۋنيۆەرسيتەتتىڭ 1948 -جىلعى تۇلەگى، فيلوسوفيا عىلىمدارىنىڭ دوكتورى، پروفەسسور، قازاقستان ۇلتتىق عىلىم اكادەمياسىنىڭ اكادەميگى دوسمۇحامەد كىشىبەكوۆتىڭ 90 جىلدىق مەرەيتويىنا ارنالعان «تۇلعا تاعىلىمى» اتتى كەزدەسۋ ءوتتى. بۇل تۋرالى ۋنيۆەرسيتەتتىڭ باسپا ءسوز قىزمەتى حابارلادى.

كەزدەسۋگە قازاقستاننىڭ ەڭبەك سىڭىرگەن قايراتكەرى، قازاقستان رەسپۋبليكاسى ۇلتتىق جاراتىلىستانۋ عىلىمدارى اكادەمياسىنىڭ اكادەميگى، فيلوسوفيا عىلىمىنىڭ دوكتورى، ق. ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ پروفەسسورى  ۇلىقپان سىدىقوۆ، ر. سۇلەيمەنوۆ اتىنداعى شىعىس تانۋ ينستيتۋتىنىڭ باس عىلىمي قىزمەتكەرى، تاريح عىلىمدارىنىڭ دوكتورى، پروفەسسور كوشىم ەسماعامبەت، قازاق گۋمانيتارلىق زاڭ ۋنيۆەرسيتەتىنىڭ پروفەسسورى، ساياسي عىلىمدارىنىڭ دوكتورى ابدىجالەل باكىر، ق. ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ دوتسەنتى، فيلوسوفيا عىلىمدارىنىڭ كانديداتى تيمۋر كىشىبەكوۆ جانە ۋنيۆەرسيتەتتىڭ پروفەسسور- عالىمدارى مەن ستۋدەنت- جاستار قاتىستى.

جيىندى فيلولوگيا عىلىمدارىنىڭ دوكتورى، پروفەسسور باعدات كارىبوز ۇلى جۇرگىزىپ وتىردى. كەزدەسۋدىڭ اشىلۋىندا ۋنيۆەرسيتەت رەكتورى، تەحنيكا عىلىمدارىنىڭ دوكتورى، پروفەسسور قىلىشباي الدابەرگەن ۇلى بيسەنوۆ اكادەميك د. كىشىبەكوۆتىڭ ونەگەلى ءومىرى مەن وتاندىق عىلىمعا قوسقان ولشەۋسىز ۇلەسىنە توقتالىپ، عالىمدى ۋنيۆەرسيتەت رەكتوراتىنىڭ شەشىمىمەن «قورقىت اتا اتىنداعى التىن مەدالمەن» ماراپاتتادى.

فيلوسوفيا سالاسىندا دارا تانىلعان اكادەميك جايلى ارىپتەس- زامانداستارى  ۇلىقپان سىدىقوۆ، ابدىجالەل باكىر، ۋنيۆەرسيتەت عالىمدارى ق. قۇدايبەرگەن ۇلى، و. بەرماحانوۆ ەستەلىكتەر ايتىپ، مەرەيتوي يەسىنىڭ تۇلعالىق بولمىسىنا توقتالدى.

عالىم ۇلىقپان سىدىقوۆ سىر توپىراعى قازاقتىڭ قابىرعالى ازاماتتارىن تۇلەتكەن كيەلى مەكەن ەكەندىگىن اتاپ ءوتتى. «وسىنداي ۇلت ماقتانىشتارىنىڭ ءبىرى - «قازاق فيلوسوفياسىنىڭ بايتەرەگى» د. كىشىبەكوۆ»، - دەدى ول ءوز سوزىندە.

عىلىمعا جاستايىنان قۇمارتقان د. كىشىبەكوۆ 1965 -جىلى ۆ. ي. لەنين اتىنداعى ماسكەۋ مەملەكەتتىك پەداگوگيكالىق ينستيتۋتىنىڭ عىلىمي كەڭەسىندە ديسسەرتاتسيا قورعاپ، نەبارى 40 جاسىندا فيلوسوفيا عىلىمدارىنىڭ دوكتورى اتاندى. 1996 -جىلدان قانىش ساتبايەۆ اتىنداعى قازاق ۇلتتىق تەحنيكالىق ۋنيۆەرسيتەتىنىڭ پروفەسسورى.

ءوزىنىڭ وتاندىق عىلىمعا قوسقان ولشەۋسىز ۇلەسى ءۇشىن 2003 -جىلى قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى بولىپ سايلاندى. 800 دەن استام عىلىمي ەڭبەگى، 70 مونوگرافياسى مەن كىتاپتارى جارىققا شىققان. بۇگىندە اكادەميكتىڭ عىلىمي دالەدەنگەن قۇندى پىكىرلەرى قوعام دامۋىنا ءوز سەپتىگىن تيگىزىپ كەلەدى.

كەزدەسۋ سوڭىندا قاتىسۋشىلار «فيلوسوفيا - ادامزاتتىڭ دانالىق ءىلىمى» اتتى كىتاپ كورمەسىن تاماشالادى.

 

 اۆتور: ەلۋباي اۋەزوۆ