سوعىس. 1945 ج. 27 - ءساۋىرى: كەڭەس اسكەرلەرى بەرليننىڭ ەڭ سوڭعى قورعانىس شەبى - تيرگارتەنگە شىقتى - فوتو
بۇل تۋرالى «سوتسياليستىك قازاقستان» گازەتىنىڭ 1945 - جىلدىڭ 29 - ساۋىرىندەگى (جەكسەنبى) №84- سانىندا باسىلعان كەڭەس اقپارات بيۋروسىنىڭ مالىمەتىندە ايتىلعان.
ايتا كەتەلىك، تيرگارتەن (زووباق) - بەرليننىڭ ورتالىق اۋماعى. ارال ىسپەتتەس. اينالاسى شپرە وزەنى جانە باسقا دا سۋ ارنالارىمەن قورشالانعان. ۇزىندىعى 8 شاقىرىم، ال ەنى 2 شاقىرىمدى قۇرايدى.
بەرليننىڭ ورتالىعىنا جاقىنداعان سايىن، قۇرامالار مەن بولىمشەلەردىڭ شابۋىلداۋ ۋچاسكەلەرى تارىلا باستادى. بۇل ارينە قولباسشىلىق تاراپىنان اسا ساقتىقپەن، ۇيلەسىمدى سوعىس قيمىلدارىن جاساۋدى تالاپ ەتتى.
سونىمەن، بەرليندە كوشە ۇرىستارى جالعاسۋدا. ناقتىراق ايتار بولساق، 1- بەلورۋس مايدانىنىڭ 2- گۆارديالىق تانك ارمياسى شپرەە وزەنىنە ءوتىپ، ۆەستەند ستانساسىن العان سوڭ، تيرگارتەن پاركىنە جانە بەرليننىڭ ورتالىق اۋداندارىنىڭ ءبىرى - شرلوتتەنبۋرگكە قاراي جىلجىپ جاتىر. 3- ەكپىندى ارميا فەربينگدۋس سۋ ارناسىنان ءوتىپ، موابيت اۋدانىنا جاقىندادى. 5- ەكپىندى ارميا 1250 مەتر العا جىلجىپ، قالانىڭ 40 تان استام كۆارتالىن جاۋدان تازارتتى. ال 1- گۆارديالىق تانك ارمياسى نەيكەلن اۋدانىندا اۋىر ۇرىستار جۇرگىزە وتىرىپ، قالانىڭ 80 كۆارتالىن باسىپ الدى.
«1- بەلورۋس مايدانىنىڭ اسكەرلەرى شابۋىلداي وتىرىپ، 27 - ءساۋىر كۇنى ورتالىق گەرمانيانىڭ ماڭىزدى قورعانىس توراپتارى - راتەنوۆ، شپانداۋ جانە پوتسدام قالالارىن الدى. ءبىر مەزەتتە مايدان اسكەرلەرى بەرليندە كوشە ۇرىستارىن جۇرگىزە وتىرىپ، نەيكەللن، تەمپەلحوف اۋداندارىن جانە تەمپەلحوف اۋەجايىن باسىپ الدى» - دەلىنگەن مالىمەتتە.
26 - ءساۋىر كۇنى بولعان ۇرىستاردا مايدان اسكەرلەرى 8500 نەمىس سولداتى مەن وفيتسەرىن قولعا ءتۇسىرىپ، 20 ۇشاق، 200 تانك جانە 290 دالا زەڭبىرەگىن ولجالاعان.
ال 1- ۋكراين مايدانىنىڭ اسكەرلەرى مەن انگلو- امەريكالىق اسكەرلەر شىعىستان جانە باتىستان شابۋىلداي وتىرىپ، 25 - ساۋىردە تورگاۋ قالاسى ماڭىندا 13 ساعات 30 مينۋتتا قوسىلدى. وسىلايشا، گەرمانيانىڭ سولتۇستىگىندەگى نەمىس اسكەرلەرى، وڭتۇستىكتەگى اسكەرلەردەن ءبولىنىپ تاستالدى.
«27- ساۋىردە مايدان اسكەرلەرى نەمىستەردىڭ ەلبا وزەنىندەگى ماڭىزدى قورعانىس پۋنكتى ۆيتتەنبەرگ قالاسىن الدى. سونىمەن قاتار مايدان اسكەرلەرى بەرليندە دە كوشە ۇرىستارىن جۇرگىزىپ، شتەگليتس جانە شمارگەندورف اۋداندارىن الدى» - دەلىنگەن مالىمەتتە.
26 - ءساۋىر كۇنى بولعان ۇرىستاردا مايدان اسكەرلەرى 3000 نان استام نەمىس سولداتى مەن وفيتسەرىن قولعا ءتۇسىرىپ، دۇشپاننىڭ 85 ۇشاعىن ولجالادى.
چەحوسلوۆاكيا جەرىندە 2- ۋكراين مايدانىنىڭ اسكەرلەرى ۋگەرسكي برود جانە ۋگەرسكي وستروگ قالالارىن جانە سۋحا لوز، حاۆرجيتسە، ۆلچنوۆ، گلۋك جانە بلاتنيتسە ەلدى- مەكەندەرىن ازات ەتتى.
2- بەلورۋس مايدانىنىڭ اسكەرلەرى بولسا 27- ءساۋىر كۇنى گەرمانيانىڭ باتىس پومەرانيا پروۆينتسياسىنىڭ پرەنتسلاۋ، انگەرميۋندە جانە پەليتتس قالالارىن جانە ياسەنيتتس، حاممەر، شتولتسەنبۋرگ، پامپوۆ، مەۆەگەن، بووك، لەكنيتتس، بەرگحولتس، بريۋسسوۆ، فارەنۆالدە، كلوكوۆ، بەرتيكوۆ، گرامتسوۆ، پاسسوۆ، حوەن لاندين ءىرى ەلدى- مەكەندەرىن الدى.
اۆتور: جاپپاربەرگەن ايبوتا
