ۆەنا قالاسىندا كوشە ۇرىستارى باستالدى - كەڭەس اقپارات بيۋروسىنىڭ 1945 جىلى 11 - ساۋىرىندەگى مالىمەتىنەن
«سوتسياليستىك قازاقستان» گازەتىنىڭ 1945 -جىلعى 13 -ساۋىردە شىققان سانىندا 3- ۋكراين مايدانى اسكەرلەرىنىڭ اۆستريا استاناسى ۆەنا قالاسىندا كوشە ۇرىستارىن جۇرگىزىپ جاتقاندىعىن جاريالادى.
كەڭەس اقپارات بيۋروسى سوعىس بارىسىن بىلايشا مالىمدەيدى:
«11 -اپرەلدە كارپات وڭىرىندە رۋجومبەروك كالاسىنىڭ باتىس جاعىندا، اسكەرلەرىمىز چەحوسلوۆاك جانە رۋمىن اسكەرلەرىمەن بىرگە شابۋىل جاساي وتىرىپ، سۆياتوي مارتين قالاسى مەن تەمىر جول ستانسياسىن، ۆرۋتكي تەمىر جول تورابى ستانسياسىن جانە 40 تان اسا باسقا ەلدى- مەكەندەردى، ولاردىڭ ىشىندە شۋتوۆو، راتكوۆو، تۋراني، سۋچانى، دراجكوۆتسە، زابارە، جابوكرەكي، بيستريچكا، ترەبوستوۆو، پريبوۆتسە، ۆالچا، لازانى، ۆريتسكو قىستاقتارىن ۇرىسپەن الدى.
براتيسلاۆانىڭ سولتۇستىك- باتىس جاعىندا 2-ۋكراين مايدانىنىڭ اسكەرلەرى موراۆا وزەنىنىڭ باتىس جاعىندا شابۋىل جاساي وتىرىپ، اۆستريا جەرىندە ديۋرنكرۋت، شتيللفريد، وللەرسدورف، ۆەيدەندورف. ەبەنتال، پروتەس، ورەلم، شپاننبەرگ، ماتسەن، راگگەندورف، رەيەرسدورف كىستاقتارىن الدى.
ال ۆەنادا 3-ۋكراين مايدانىنىڭ اسكەرلەرى دۋناي كانالىنان ءوتىپ، كانال مەن دۋناي وزەنى ارالىعىنداعى قالا اۋدانىنىڭ وڭتۇستىك- شىعىس جاعىن الدى. قازىر قالا كوشەلەرىندە ويداعىداي ۇرىستار جۇرگىزۋدە»، - دەلىنگەن.
سونىمەن قاتار، نەمىس باسقىنشىلارى اۆستريانىڭ قالالارى مەن سەلولارىنىڭ حالقىن شەگىنگەن نەمىس اسكەرلەرىمەن بىرگە كوشىرمەك بولادى. ولار حالىقتى قورقىتۋ ءۇشىن قىزىل ارميا جايىندا قيسىنسىز وسەكتەر تاراتادى. دەگەنمەن، حالىقتىڭ باسىم كوپشىلىگى كوشۋدەن باس تارتقان.
مالىمەت سوڭىندا اسكەري ولجالار جايلى ايتىلادى: «مايداننىڭ باسقا ۋچاسكەلەرىندە ايتارلىقتاي وزگەرىس جوق.
10 -ساۋىردە نەمىستەردىڭ 13 تانكىسى قيراتىلدى، جويىلدى. اۋە ۇرىستارىندا جانە زەنيت زەڭبىرەكتەرىمەن دۇشپاننىڭ 16 ۇشاعى اتىپ ءتۇسىرىلدى. ءبىر كۇنگە ۇرىستاردا جاۋدىڭ 4000 اسا سولداتتارى مەن وفيتسەرلەرى قولعا ءتۇستى»، - دەپ جازىلعان.
***
گازەتتىڭ كوشىرمەلەرى قر مادەنيەت جانە سپورت مينيسترلىگىنىڭ «قۇجات تانۋ جانە مۇراعات ءىسى جونىندەگى عىلىمي- تەحنيكالىق اقپارات ورتالىعى» ر م م- نەن الىندى. ورتالىق ديرەكتورى القيا راحىمبايەۆاعا العىس بىلدىرەمىز.
اۆتور: جاپپاربەرگەن ايبوتا
