ناۋرىز مەرەكەسىندە 190 كيىز ءۇي تىگىلەدى
بۇل تۋرالى پاۆلودار وبلىسىنىڭ مادەنيەت، تىلدەردى دامىتۋ جانە ارحيۆ ءىسى باسقارماسىنىڭ باسشىسى سامال بەگالينوۆانىڭ ايتۋىنشا، ءوڭىردىڭ قالا، اۋداندارىندا جانە اۋىلدارىندا 20-23 - كۇندەرى ناۋرىز مەرەكەسىنە ارنالعان شارالار كوپشىلىك ءىس-شارا رەتىندە وتەدى.
الاڭداردا كيىز ۇيلەر تىگىلىپ، مادەني جانە سپورتتىق ءىس-شارالار ۇيىمداستىرىلادى.
وبلىس بويىنشا جالپى 190 كيىز ءۇي ورناتىلاتىن بولادى. سونداي-اق ول كيىز ۇيلەردە داستارحان جايىلمايتىنىن اتاپ ءوتتى.
- كيىز ۇيلەردىڭ بارلىعى كورمەلىك ۇيلەر بولادى. ىشىندە تاماق ازىرلەنبەيدى. داستارحان جايىلمايدى. تۇرعىندار ۇيلەردەن تىس اۋماقتاردا دەمەۋشىلەر ەسەبىنەن ناۋرىز كوجە مەن باۋىرساقتاردان اۋىز تيەتىن بولادى، - دەدى باسقارما باسشىسى.
ايتا كەتەر جايت؛ 23 - ناۋرىز كۇنى قايىرىمدى ۇلت كۇنى دەپ جاريالانعان. بۇل كۇنى بارلىق سالا، بارشا اكىمدىك قايىرىمدىلىق شارالارىن وتكىزەدى. سونىمەن قاتار، وبلىس تۇرعىندارى ءۇشىن «يربيس» تەلەارناسىمەن بىرلەسىپ، «بەرەكەلى مەرەكە» تەلەجوباسى دايىندالۋدا. بۇل - تەاترلاندىرىلعان قويىلىم. جوبادا وتباسىلىق قۇندىلىقتار، سالت-داستۇرلەر كورسەتىلەدى.
بۇل جوبا 22 - ناۋرىز كۇنى ساعات 16:00 دە، 23 - ناۋرىزدا ساعات 11:00 دە ەفيرگە شىعادى، - دەيدى سامال بەگالينوۆا.
23 - ناۋرىز ساعات 15:00 دە «شاڭىراق» كونسەرتتىك زالىندا «ەرتىس ارۋى» اتتى وبلىستىق سۇلۋلىق بايقاۋى وتەدى.