دوللار بىردەن 190 تەڭگەدەن اسىپ كەتپەيدى - ق. كەلىمبەتوۆ

استانا. قازاقپارات - ق ر ۇلتتىق بانكىنىڭ ءتوراعاسى قايرات كەلىمبەتوۆ ۆاليۋتانىڭ جاڭا دالىزىنە بايلانىستى دوللاردىڭ باعامى بىردەن شارىقتاپ كەتپەيتىن بولادى.

ونىڭ ايتۋىنشا، الداعى توقساندا دوللار باعامى بۇگىنگى دەڭگەيدە قالا بەرمەك.

ايتا كەتەيىك، بۇگىنگى كۇننەن باستاپ دوللاردىڭ تەڭگەگە شاققانداعى ءدالىزى 198 تەڭگەگە دەيىن كەڭەيتىلگەن بولاتىن.

وسىعان وراي تىلشىلەر ۇلتتىق بانك باسشىسىنا: «دوللار باعامى بۇگىننەن باستاپ 190 تەڭگەدەن اسىپ جىعىلادى دەگەندى بىلدىرەدى مە؟» دەگەن ساۋال تاستاعان بولاتىن.

ءوز كەزەگىندە ق. كەلىمبەتوۆ دوللاردىڭ باعامى الداعى توقسانعا دەيىن وزگەرمەيتىنىن حابارلادى.

«ءبىرىنشى جارتىجىلدىقتا دوللار 2,5 پايىزعا وسكەن. بۇل جارتى جىلدا بولعان ءوسىم. سۇرانىستى ارتتىرۋدىڭ ەشبىر قيسىنىن كورىپ وتىرعانىمىز جوق. جاقىن ارادا بۇگىنگى باعام قالا بەرەدى. ءبىزدىڭ كەڭەيتىلگەن دالىزگە كەلەتىن بولساق، ول بىردەن ورىن المايدى. الداعى توقساندا ورىن الادى دەپ ويلاپ وتىرمىز»، - دەدى ول.

اۆتور: جاسۇلان جولدىبايەۆ