ابايدىڭ 1909-جىلى جارىق كورگەن كىتابى قايتا قالپىنا كەلتىرىلدى
قۇندى جيناقتى سەمەي قالاسىنىڭ ايماقتىق كوممۋنيكاتسيالار قىزمەتىندە وتكەن باسپا ءسوز كونفەرەنتسياسىندا اباي مۋزەيىنىڭ وكىلدەرى تانىستىردى.
«1909-جىلى حاكىم قايتىس بولعاننان كەيىن ونىڭ العاشقى جيناعى باسىلىپ شىققان ەدى. كىتاپتىڭ جارىق كورۋىنە ونىڭ ۇلى تۇراعۇلدىڭ، نەمەرە ءىنىسى كاكەتايدىڭ جانە «الاش» قوزعالىسىنىڭ جەتەكشىسى ءاليحان بوكەيحاننىڭ ۇلەسى زور بولعان. جيناق نۇر-سۇلتان قالاسىنداعى قولجازبالار جانە سيرەك كەزدەسەتىن كىتاپتاردىڭ ۇلتتىق ورتالىعىندا قايتا قالپىنا كەلتىرىلدى. ورتالىق ماماندارى سەمەيگە كەلگەندە، ءبىزدىڭ مۋزەيدە بىرەگەي جيناقتىڭ بار ەكەنىن ءبىلىپ، ونى رەستاۆراتسيالاۋ تۋرالى شەشىم قابىلدادى. وسىعان دەيىن كىتاپتىڭ مۇقاباسى بولماي، ءارى ءبىراز بەتتەرى جىرتىلعان ەدى. قازىر جاڭارتىلعان جيناق مۋزەيگە ورالدى»، - دەدى مۋزەي ديرەكتورىنىڭ ورىنباسارى مەيرامگۇل قايرامبايەۆا.
كىتاپ 120 بەتتەن تۇرادى. «حالىق تۋرالى»، «ماحاببات تۋرالى» سىندى بولىمدەرگە بولىنگەن. جيناققا ابايدىڭ جۇزگە جۋىق شىعارماسى ەنگەن.
