بانك دەپوزيتتەرىندە قازاقستاندىقتاردىڭ 19,9 تريلليون تەڭگەسى ساقتاۋلى

نۇر- سۇلتان. قازاقپارات - بانك جۇيەسىندەگى دەپوزيتتەر 19,9 تريلليون تەڭگە بولدى. بۇل تۋرالى ق ر ۇلتتىق بانك ءتوراعاسى ەربولات دوسايەۆ ءمالىم ەتتى، دەپ حابارلايدى قازاقپارات ءتىلشىسى.

«بيىلعى ماۋسىم ايىنىڭ سوڭىندا بانك جۇيەسىندەگى دەپوزيتتەر تەڭگەدەگى سالىمداردىڭ ءوسۋى ەسەبىنەن جىل باسىنان بەرى 4,4 پايىزعا نەمەسە 846 ميلليارد تەڭگەگە ۇلعايىپ، 19,9 تريلليون تەڭگە بولدى»، - دەدى ۇلتتىق بانك باسشىسى ۇكىمەت وتىرىسىندا.

ونىڭ سوزىنە قاراعاندا، ۇلتتىق ۆاليۋتاداعى سالىمدار 11,9 تريلليون تەڭگەگە دەيىن 10,2 پايىزعا ءوستى. ۆاليۋتالىق سالىمدار بيىلعى ماۋسىم ايىنىڭ سوڭىندا 3,1 پايىزعا (نەمەسە 258 ميلليارد تەڭگەگە) ازايىپ، 7,9 تريلليون تەڭگە بولدى. ناتيجەسىندە، دەپوزيتتەردىڭ دوللارلانۋ دەڭگەيى وسى جىلعى ماۋسىم ايىندا 40 پايىزعا دەيىن تومەندەدى (2019 -جىلعى جەلتوقساندا 43,1%).

اۆتور: رۋسلان عابباسوۆ