قوستاناي وبلىسىندا قىرىلعان اقبوكەندەر سانى 19,2 مىڭعا جەتتى
وبلىستىق ت ج د دەرەكتەرىنە سۇيەنسەك، كومىلگەن جانۋارلار سانى 19 مىڭ 231 گە جەتكەن.
بۇدان بۇرىن ولاردىڭ سانى 10 مىڭ ەكەنى ايتىلعان. ولاردىڭ قىرىلۋىنىڭ الدىن الا سەبەبى - پاستەرەللەز اۋرۋى.
امانگەلدى اۋدانى ورتالىعىنان 70 شاقىرىمدا ورنالاسقان ۇرپەك اۋىلدىق وكرۋگىنىڭ جولابا ۋچاسكەسىندە 18- مامىردان باستاپ ت ج جويۋ جەدەل توبى جۇمىس ىستەۋدە.
ت ج د حابارلاعانداي، توتەنشە جاعدايدى جويۋعا 515 ادام مەن 76 تەحنيكا جۇمىلدىرىلعان. 100 ادام دالا لاگەرىندە تۇرىپ جاتىر. امانگەلدى اۋدانى اكىمدىگىنىڭ كۇشتەرى، 6697№ اسكەري ءبولىمى، «التىن دالا ر م ك» م م كۇشتەرىمەن 3 تاماقتاندىرۋ پۋنكتى ازىرلەندى.
«تۇندە تۇنەۋ ءۇشىن اۋدان اكىمدىگى 3 كيىز ءۇي، اقمولا وبلىسى ت ج د 3 شاتىر، قوستاناي وبلىسى ت ج د اسحاناعا ارنالعان ءبىر شاتىر، 6697№ اسكەري ءبولىمى 6 شاتىر تىكتى. ولاردىڭ ۇشەۋى قوسالقى ماقساتتا. جەكە قۇرام اۋىزسۋمەن، تەحنيكا جانار-جاعارمايمەن قامتاماسىز ەتىلگەن»، - دەلىنگەن حابارلامادا.
