جاڭا اۆتوموبيلدەر رەكوردى: تامىزدا 18 مىڭنان اسا تەحنيكا ءوتتى

«قازاقستاننىڭ اۆتوكولىك وداعى» (ق ا و) بەرگەن مالىمەت بويىنشا جازدىڭ سوڭعى ايىندا ەلدە 17200 جەڭىل اۆتوموبيل مەن جەڭىل كوممەرتسيالىق تەحنيكا، 1031 جۇك كولىگى مەن اۆتوبۋس ساتىلعان، بۇل بىلتىرعى تامىزبەن سالىستىرعاندا 59,5 پايىزعا كوپ.

جىل باسىنان بەرى وتاندىق ديلەرلەر 120322 اۆتوموبيلدىڭ (60,5+ پايىز) كىلتىن تاپسىرىپتى.

«جاز شىعا سالا باستالعان رەكورد جاڭارتۋ ترەندى تامىزدا دا جالعاسىن تاۋىپ، 18000 جاڭا اۆتوموبيل ساۋداعا ءتۇستى. بۇل 2023-جىلعى عانا ەمەس، قازاقستان اۆتوريتەيلىنىڭ تاريحىندا بولماعان كورسەتكىش. درايۆەر - برەندتەر تاراپىنان ۇسىنىس كوبەيىپ، توپتاماعا بيۋجەتتىك مودەلدەردىڭ كوپتەپ قوسىلۋى جانە ءتۇرلى قارجىلىق باعادارلامالار»، - دەدى ق ا و پرەزيدەنتى انار ماقاشيەۆا.

تامىزدا Hyundai ساۋداسى قىزعان 10 ماركا اراسىندا ۇزدىك اتاندى (وتكەن جىلعى تامىزبەن سالىستىرعاندا 4624؛ 107,7+ پايىز). Chevrolet- ءتىڭ 3363 اۆتوموبيلى (13,4- پايىز) يەسىن تاپتى. ءۇشىنشى ورىن Kia ەنشىسىندە (1713؛ 15,4+ پايىز).

Chery برەندى 1694 (226,4+ پايىز) ماشينا ساتىپ، ءتورتىنشى قاتاردان كورىندى.

ونىڭ بۇل جەتىستىگىنە Tiggo 2 ەداۋىر ۇلەس قوستى. قوستانايدان شىققان Jac-تىڭ 874 (199,3+ پايىز) كولىگى وتكەن. Toyota تامىزدا التىنشى ورىندى قاناعات تۇتتى (825؛ 17,3- پايىز).

سوڭعى ءبىر-ەكى ايدا Changan مەن Haval ءوزارا ورىن الماسىپ كەلەدى (768 جانە 752).

ۇزدىك وندىققا Jetour (634) مەن Geely (368) قوسىلدى.

ەڭ تانىمال مودەلدەر كوشىن ادەتتەگىدەي Chevrolet Cobalt (2030) باستادى، ودان كەيىن Hyundai Tucson (1416) كەلەدى. ۇشتىكتى Kia Sportage (845) تۇيىندەدى. ءتورتىنشى ورىن العاش رەت Chery Tiggo 2 (840) كروسسوۆەرىنە بۇيىردى. ءارى قاراي تىزىمدە Hyundai Sonata (520)، Jac J7 (471) جانە Chery Tiggo 7 Pro (436) تۇر.

سەگىز اي قورىتىندىسى بويىنشا Hyundai (31381؛ 76,4+ پايىز) وزا شاۋىپ، 28768 اۆتوموبيلى وتكەن Chevrolet- ءنى (40,4+ پايىز) شاڭ قاپتىردى. ءۇشىنشى قاتارعا جايعاسقان Kia-نىڭ 16 384 مودەلى (95,3+ پايىز) ءوتتى. Chery ديلەرلەرى 6977 ماشينا (268,8+ پايىز) ساتتى. Toyota-نىڭ 5698 (11,1- پايىز) ءونىمى ءوتتى.

«2023-جىلى نارىق سوڭعى جىلدارى جاھاندى جايلاعان داعدارىستان ەپتەپ شىعىپ، جاندانا باستادى. دەگەنمەن قيىن ساتتە دە قازاقستاننىڭ اۆتومومبيل سالاسى ءوز دەڭگەيىن ساقتادى، بۇل كومپلەكت جەتكىزۋشىلەرمەن كەلىسىپ، بالاما لوگيستيكا باعىتتارىن قۇرعان وتاندىق كاسىپورىندار مەن برەند ۇستاۋشىلاردىڭ سەنىمى ارقاسىندا جۇزەگە اسقان ءىس. مۇنىڭ ءبارى ەلگە كوپتەپ كولىك جەتكىزۋگە، نارىققا جاڭا برەندتەر شىعارۋعا مۇمكىندىك بەردى. وسى ماۋسىمدا ديستريبيۋتورلار تاعى بىرنەشە كولىكتى تانىستىرۋعا دايىندالىپ جاتىر، كاسىپورىندار ءوندىرىس كولەمىن ۇلعايتتى. باسەكە بولسا، ديلەرلەر كليەنتتەرگە جاقسى قارجى باعدارلامالارىن ۇسىنىپ، ءتۇرلى شارا وتكىزۋگە، سەرۆيستىك قىزمەتتىڭ ەڭ جاقسى شارتتارىن ۇسىنۋعا تىرىسادى، سوندىقتان ساۋدا دا قىزادى»، - دەدى ق ا و پرەزيدەنتى انار ماقاشيەۆا.