ۇلتتىق قوردان 18 جاسقا دەيىنگى ءار بالاعا اۋدارىلاتىن قاراجات سوماسى قانشا
«مەملەكەت باسشىسىنىڭ تاپسىرماسىن ورىنداۋ ماقساتىندا مۇددەلى مەملەكەتتىك ورگاندارمەن بىرلەسىپ، قارجى مينيسترلىگى 2024-جىلدان باستاپ «ۇلتتىق قور - بالالارعا» جوباسىن ىسكە قوسۋ تاسىلدەرىن ازىرلەدى. وسى جوبا بويىنشا ۇسىنىلعان تاسىلدەر ەكونوميكالىق ساياسات جونىندەگى كەڭەستە، ساراپتامالىق قوعامداستىقپەن جانە باسقا الاڭداردا تالقىلانىپ جاتىر. ۇلتتىق قوردىڭ ينۆەستيتسيالىق كىرىسىنىڭ 50 پايىزى 18 جاسقا دەيىنگى بارلىق جاستاعى بالالار اراسىندا بولىنەدى»، - دەدى داۋرەن تەمىربەكوۆ سەنات دەپۋتاتتارىمەن كەزدەسۋ كەزىندە.
ونىڭ ايتۋىنشا، ينۆەستيتسيالىق تابىستىڭ ىقتيمال تەرىس ماندەرىن جەكەلەگەن ۋاقىت ارالىقتارىندا تۇزەتۋ ماقساتىندا ونىڭ مولشەرلەمەسىن الدىڭعى كەزەڭدەردە ورتاشا جىلدىق شامانىڭ نەگىزىندە ايقىنداۋ جوسپارلانىپ وتىر.
«الدىن الا باعالاۋ بويىنشا مۇنداي ءتاسىل وسى باعدارلاما اياسىندا تۋعاننان باستاپ قامتىلاتىن بالاعا جىل سايىن 150-160 ا ق ش دوللار كولەمىندە 18 تولەم الۋعا مۇمكىندىك بەرەدى. الەۋمەتتىك جوبالاردى ىسكە اسىرۋ بويىنشا كوپ جىلدىق تاجىريبەنى ەسكەرە وتىرىپ، جوبا وپەراتورى رەتىندە «ءبىرىڭعاي جيناقتاۋشى زەينەتاقى قورى» اكسيونەرلىك قوعامى ايقىندالادى»، - دەدى ۆيتسە-مينيستر.
بۇدان بۇرىن حابارلانعانداي، مەملەكەت باسشىسى بىلتىرعى جولداۋىندا بالالار جىلى اياسىندا «ۇلتتىق قور - بالالارعا» اتتى جاڭا باعدارلاما ىسكە قوسىلاتىنىن ايتقان بولاتىن. وسى رەتتە جىل سايىن ۇلتتىق قوردىڭ ينۆەستيتسيالىق تابىسىنىڭ %50 بالالاردىڭ جەكە شوتىنا اۋدارىپ وتىرۋدى ۇسىندى. اۋقىمدى جوبا 2024-جىلدىڭ 1-قاڭتارىنان باستاپ ىسكە قوسىلماق.