ەلورداداعى كولىك اپاتى: 18 جاستاعى بويجەتكەن اۋىر حالدە جاتىر
جانتۇرشىگەرلىك جول اپاتىنان امان قالعان 18 جاستاعى جولاۋشىنىڭ جاعدايى بەلگىلى بولدى، دەپ حابارلايدى قازاقپارات ءتىلشىسى.
جول اپاتىنان زارداپ شەككەن جولاۋشى ەلورداداعى اكادەميك نۇرلان باتپەنوۆ اتىنداعى ۇلتتىق عىلىمي تراۆماتولوگيا جانە ورتوپەديا ورتالىعىنا جەتكىزىلگەن.
«كەشە جول اپاتىنان كەيىن 18 جاستاعى قىز وتە اۋىر حالدە ءتۇستى. ناۋقاستىڭ ومىرتقاسى سىنعان جانە تراۆماتيكالىق شوك العان. پاتسيەنتكە شۇعىل وتا جاسالدى جانە قازىرگى جاعدايى اۋىر»، - دەپ حابارلاندى اتالعان ورتالىقتان.
بۇعان دەيىن حابارلاعانىمىزداي، كەشە تۇندە ەلوردادا كوپىر ۇستىندە ەكى كولىك سوقتىعىسىپ، سالدارىنان 5 ادام مەرت بولدى. ءوز كەزەگىندە قالالىق پوليتسيا دەپارتامەنتى اۋا رايىنىڭ قولايسىزدىعىنان ەلوردادا جول اپاتتارىنىڭ جيىلەي تۇسكەنىن حابارلادى. جانە جولاۋشىلاردى جول ەرەجەسىن ساقتاپ، ساق بولۋعا شاقىردى.
اۆتور: ءالي يبرايەۆ
