قازاقپارات كۇنتىزبەسى: 18- اقپان
بۇكىل الەمدىك اقپاراتتى باسقارۋ كۇنى
جىل سايىن اقپاننىڭ ءۇشىنشى بەيسەنبىسىندە اتاپ وتىلەدى. زاماناۋي الەمدە اقپاراتتى باسقارۋ ماڭىزدىلىعىنا نازار اۋدارتۋ، ونىڭ نەگىزگى پرينتسيپتەرى جايىندا حاباردارلىقتى ارتتىرۋ ماقساتىندا اتاپ وتىلەدى.
ەستە قالار وقيعالار
1992 -جىلى قازاقستان بالالارىنىڭ «بوبەك» قايىرىمدىلىق قورى قۇرىلدى. ونىڭ نەگىزگى ماقساتى - انا مەن بالانى قورعاۋ.
1992 -جىلى الماتىدا قازاقستان، قىرعىزستان، وزبەكستان، تاجىكستان جانە تۇرىكمەنستان رەسپۋبليكالارى اراسىندا مەملەكەتارالىق سۋ رەسۋرستارىن بىرلەسە باسقارۋ جانە پايدالانۋ جونىندەگى كەلىسىمگە قول قويىلدى.
1993 -جىلى شىمكەنت قالاسىنىڭ ورتالىق كوشەلەرىنىڭ بىرىنە عالىم- ەتنوگراف، فولكلورشى اۋباكىر ديۆايەۆتىڭ ەسىمى بەرىلدى.
2003 -جىلى رەسەي جانە قازاقستان پرەزيدەنتتەرىنىڭ قاتىسۋىمەن رەسەيدىڭ مەملەكەتتىك اكادەميالىق ۇلكەن تەاترىندا قازاقستاننىڭ رەسەيدەگى جىلىنىڭ اشىلۋ ءراسىمى ءوتتى. مەرەكەلىك شارالاردىڭ اياسىندا 2003-جىلدىڭ 17-20- اقپان كۇندەرى ماسكەۋدەگى كرەملدە «التىن ادام. ساق قورعاندارىنىڭ قازىناسى» كورمەلەرى، قازاقستاندىق كينو اپتالىعى، قازاقستان ونەر شەبەرلەرىنىڭ كونسەرتتەرى، ت. ب شارالار ءوتتى. قازاقستان ونەر شەبەرلەرىنىڭ گالا-كونسەرتى مەن «الەم مويىنداعان قازاقستان» اتتى كىتاپ كورمەسى بولىپ ءوتتى.
2008 -جىلى الماتىدا قازاقستانداعى العاشقى اكتۋاري مەكتەبى اشىلدى. اكتۋاري — تاۋەكەلدەر مەن مۇمكىنشىلىكتەردى باعالاي الاتىن ارنايى ءبىلىمى بار ءارى ساقتاندىرۋ كومپانيالارىنىن قارجى قىزمەتىنىڭ نەگىزى سانالاتىن ەسەپتەۋ جۇيەسىن ىسكە اسىراتىن مامان.
2013 -جىلى ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى ISO50001 ەنەرگومەنەدجمەنت جۇيەسىن ەنگىزدى. وسىلايشا ۋنيۆەرسيتەت اتالعان جۇيەنى وزىنە ەنگىزگەن ت م د اۋماعىنداعى تۇڭعىش ءارى جالعىز ۇيىم بولدى. ISO 50001 - ەنەرگوجۇيەلەردى باسقارۋ ءۇشىن ستاندارتتاۋ جونىندەگى حالىقارالىق ۇيىم ارقىلى قۇرىلعان حالىقارالىق ستاندارت، بۇل ەنەرگومەنەدجمەنت جۇيەسىن جاقسارتۋ جانە ورناتۋ، ەنگىزۋ جانە وعان كومەك كورسەتۋ بويىنشا تالاپتاردى ايقىندايدى.
2014-جىلى تۇركيانىڭ ەسكيشەحير قالاسىنداعى تۇركى الەمى ادەبي جۋرنالدارى رەداكتورلارىنىڭ VI كونگرەسىندە ق ر مەملەكەتتىك سىيلىعىنىڭ لاۋرەاتى تولەن ابدىك «2013-جىلعى تۇركى الەمىنىڭ ۇزدىك جازۋشىسى» اتاعىنا يە بولدى. تولەن ابدىكتىڭ ەڭ تانىمال كىتاپتارى 13 تۇركى تىلىنە اۋدارىلعان.
2015 -جىلى بۇكىل الەمدىك ۋنيۆەرسيادا تۋى الماتى ديرەكتسياسىنا تاپسىرىلدى. قازاقستان - ۋنيۆەرسيادا وتكىزگەن ت م د ەلدەرى اراسىنداعى تۇڭعىش مەملەكەت.
2016 -جىلى قازاقستان، ازەربايجان جانە گرۋزيا جۇكتەردى قىتايدىڭ پورتتارىنان باتۋمي پورتىنا، ول جەردەن تۇركيا جانە ەۋروپاعا تاسىمالداۋ مۇمكىندىگىن بەرەتىن تەمىرجول كونسورتسيۋمىن قۇرۋعا كەلىستى.
2016 -جىلى قازاقستان رەسپۋبليكاسى جوعارعى سوتىنىڭ جانىنان سوت تورەلىگى اكادەمياسى قۇرىلدى. اكادەميا قىزمەتىنىڭ نەگىزگى باعىتتارى - جوعارى وقۋ ورنىنان كەيىنگى ءبىلىم بەرۋ باعدارلامالارىن؛ سۋديالار مەن سوت جۇيەسى قىزمەتكەرلەرىنىڭ بىلىكتىلىگىن ارتتىرۋدى، قايتا دايارلاۋدى؛ عىلىمي قىزمەتتى جۇزەگە اسىرۋ.
2018 -جىلى ماعجان جۇمابايەۆ شىعارمالارىنىڭ جيناعى تۇرىك تىلىندە جارىق كوردى. اۋدارعان - تۇرىكتىڭ بەلگىلى اقىنى ءالي اكباش. اقيىق اقىننىڭ 125 جىلدىق مەرەيتويىنا بايلانىستى تۇركى اكادەمياسى 2018-جىلدى «ماعجان جىلى» دەپ جاريالادى. وسىعان وراي تۇركىستان يدەياسىن تۋ ەتكەن اقىننىڭ شىعارمالارىن شەت تىلدەرگە اۋدارىپ، باسىپ شىعارۋ قولعا الىندى.
2020-جىلى راحات بەكبولات تاشكەنت قالاسىندا وتكەن اۋىر اتلەتيكادان جاستار مەن جاس وسپىرىمدەر اراسىندا وتكەن ازيا چەمپيوناتىندا جاڭا الەمدىك رەكورد ورناتتى. قىزىلوردا اۋىر اتلەتيكا مەكتەبىنىڭ تاربيەلەنۋشىسى قوسسايىستا 356 كەلى (158+198) سالماق كوتەرگەن. وسىلايشا، ول 17 جاسقا دەيىنگى جىگىتتەر مەن 20 جاسقا يۋنيورلار اراسىندا چەمپيون اتانىپ، «جۇلقا كوتەرۋدەن» جاستار اراسىندا الەمدىك رەكورد ورناتتى.