سەمەي وڭىرىندە ءبىر كۇندە 18 تۇرعىننان تەرى راگى انىقتالدى
سەمەي يادرولىق مەديتسينا جانە ونكولوگيا ورتالىعى مەن ءوڭىردىڭ بارلىق ەمحانالارىندا اشىق ەسىك كۇنى ءوتتى. قابىلداۋ ءوڭىردىڭ 13 مەديتسينالىق مەكەمەسىندە جۇرگىزىلدى. ال سەمەي قالاسىندا التى ەمحانادا ۇيىمداستىرىلدى. ناتيجەسىندە 732 تۇرعىن ونكولوگ ماماندارعا قارالىپ، تەگىن كەڭەس الدى.
ءبىر كۇندە تەكسەرىلۋگە كەلگەن تۇرعىنداردىڭ 18 ىنەن مەلانوما جانە تەرى قاتەرلى ىسىگى انىقتالدى. 114 ادامنان ىسىك الدى اۋرۋلارىنىڭ بەلگىلەرى مەن 251 باسقا اۋرۋ تۇرلەرى تىركەلدى. قوسىمشا تەكسەرۋدەن وتكەن ناۋقاستار ەمدەلۋگە جىبەرىلدى.
«جالپى، 2019 -جىلدىڭ 4 ايىنىڭ قورىتىندىسى بويىنشا سەمەي وڭىرىندە ءسۇت بەزى قاتەرلى ىسىگىنەن كەيىن تەرى قاتەرلى ىسىگى ەكىنشى ورىندى تۇر. جىل باسىنان بەرى 60 تۇرعىنعا وسى دياگنوز قويىلدى. ماماندار اۋرۋدى ەرتە كەزەڭدە انىقتاۋ ءۇشىن تۇرعىنداردى دەر كەزىندە تەكسەرىلۋگە كەلۋگە كەڭەس بەرەدى» ، - دەلىنگەن سەمەي يادرولىق مەديتسينا جانە ونكولوگيا ورتالىعى تاراتقان اقپاراتتا.
ايتا كەتەيىك، جىل سايىن سەمەيدەگى يادرولىق مەديتسينا جانە ونكولوگيا ورتالىعىندا وبىر دەرتىنە شالدىققان شامامەن 5 مىڭ ادام ەمدەلەدى. تاعى 42000 ناۋقاسقا كونسۋلتاتيۆتىك كومەك بەرىلەدى.