ءسابيىمنىڭ 18 ميلليونىنشى بولىپ دۇنيەگە كەلگەنىن ەندى عانا ەستىدىم

نارەستەنىڭ اناسى ديانا ومارحانوۆا ءسۇيىنشى حاباردى جاڭا عانا ەستىدىم دەپ اعىنان جارىلدى.

 - ديانا ەرىك قىزى، قۋانىشتى ءساتتىڭ يەسى اتاندىڭىزدار، شىن جۇرەكتەن قۇتتىقتايمىن! بۇل ەلىمىز ءۇشىن ۇلكەن تاريحي ءسات. وسى قۋانىشتى حاباردى قايدان، قاشان ەستىدىڭىز؟

- جاڭا عانا ەستىدىم. ءبىر ساعاتتىڭ شاماسى عانا بولدى. تالدىقورعان قالاسىنىڭ اكىمى باعدات قاراسايەۆ قوڭىراۋ شالىپ، ءسۇيىنشى سۇرادى. قۇتتىقتادى. ارينە، بۇل جاڭالىق ءبىزدىڭ وتباسىمىز ءۇشىن توسىن سىي بولدى. ءوڭىم ەمەس، تۋرا ءتۇسىم سياقتى.

 - ءسۇيىنشى حاباردى كىممەن ءبىرىنشى ءبولىستىڭىز؟

- جولداسىمنان بۇرىن، ەنەم ەستىدى. ەنەممەن قۋانىشتى حاباردى ءبىرىنشى بولىپ ءبولىستىم. اۋلەتىمىزدىڭ باقىتى ەسەلەنىپ جاتقانىنا مىڭدا ءبىر شۇكىر دەپ، اتا- انالارىمىز دا قۋانىپ جاتىر.

 - 18 ميلليونىنشى تۇرعىننىڭ ەسىمى ەرەكشە ەكەن. اتىن كىم قويدى؟

 - جولداسىم سامات ەكەۋىمىز اقىلداسىپ مۋسليما دەپ اتادىق. بۇل ەسىم «اللاعا بوي ۇسىنۋشى»، «اللانىڭ سۇيگەن قۇلى» دەگەن ماعىنا بەرەدى. مۋسليمانى 11 - مامىر كۇنى كەشكى ساعات 20:15 بوساندىم. تالدىقورعان قالالىق پەريناتالدىق ورتالىعىندا ءسابيىم 3 كەلى 300 گرام، بويى 51 س م بولىپ دۇنيەگە كەلدى.

 - وتباسىڭىز جايلى جاڭالىقتارمەن بولىسسەڭىز؟

- مەن ءوزىم الاكول اۋدانىنداعى ءۇشارال قالاسىنىڭ تۋماسىمىن. جولداسىم اقسۋ اۋدانى سۋىقساي اۋىلىندا دۇنيەگە كەلگەن. ەكەۋىمىز دە جەتىسۋلىقپىز. مەن 1991 -جىلى، ال جولداسىم 1982 -جىلى تۋعان. قۋانىشتى حاباردى اتا- ەنەمنىڭ ۇيىندە ەستىدىك. قازىر عانا سۋىقسايدان تالدىقورعانعا جولعا شىعىپ بارامىز. قالا اكىمى ەرتەڭ ءبىزدى قابىلداپ، قۇرمەت كورسەتەتىنىن جەتكىزدى. ءوزىم دە، جولداسىم دا وتباسىندا ءتورت اعايىندىمىز. مەن ءۇيدىڭ تۇڭعىشىمىن.

 - جولداسىڭىز، ءوزىڭىز مەكتەپتە ىستەيدى دەپ ەستىپ قالدىم. ۇجىم ءۇشىن دە بۇل ۇلكەن قۋانىش ەمەس پە؟!

- ارينە، جولداسىم بەستىبايەۆ سامات ەركىنبەك ۇلى قالاداعى لومونوسوۆ اتىنداعى مەكتەپتە دەنە شىنىقتىرۋ ءپانىنىڭ ءمۇعالىمى. مەن №16 ورتا مەكتەپ گيمنازياسىندا دەفەكتولوگ بولىپ جۇمىس ىستەيمىن.

- مۋسليما جانۇيالارىڭىزدىڭ ەكىنشى بالاسى. تۇڭعىشتارىڭىز ۇل، الدە قىز بالا ما؟

 - تۇڭعىشىمىز ۇل. ەسىمى سۇلتان. 2,5 جاستا.

- قانداي اسەردە وتىرسىز؟

- بىرىنشىدەن، قۇتتىقتاپ، قۋانىشىمىزدى ءبولىسىپ، قوڭىراۋ شالىپ جاتقان بارشا اعايىنعا، حالقىما ۇلكەن العىسىمدى بىلدىرەمىن. ءاردايىم شاڭىراعىمىز شاتتىق پەن باقىتقا، ءسابيدىڭ ۇنىنە تولسىن. قازاق سانى كوبەيىپ، دەموگرافيالىق احۋالىمىز جاقسارا بەرسىن.

- سۇحباتىڭىزعا راحمەت!

 اۆتور: سامال قابىشيەۆا