09:55, 11 - ناۋرىز 2017 | GMT +5
جىل باسىنان بەرى بيۋدجەتكە پاتەردى جالعا بەرۋشىلەردەن 18 ميلليون تەڭگەدەن اسا قارجى ءتۇستى
استانا. قازاقپارات - «ەلورداداعى قاۋىپسىزدىك پەن جايلىلىق» پيلوتتىق جوباسىن ىسكە اسىرۋ شەڭبەرىندە ءتيىستى تىركەۋسىز پاتەردى جالعا بەرۋمەن اينالىساتىن تۇلعالاردى انىقتاۋ شارالارى جۇرگىزىلۋدە.
اتالعان شارانى استانا قالالىق ىشكى ىستەر دەپارتامەنتىنىڭ جەرگىلىكتى پوليتسيا قىزمەتى ەلوردالىق مەملەكەتتىك كىرىستەر دەپارتامەنتىنىڭ وكىلدەرىمەن بىرلەسە وتكىزۋدە، دەپ حابارلايدى ەلوردا اكىمدىگىنىڭ باسپا ءسوز قىزمەتى.
شارالاردىڭ ناتيجەسىندە جىل باسىنان بەرى 1000 نان اسا جەكە كاسىپكەر تىركەلدى، مەملەكەتتىڭ كىرىسىنە 18 ميلليون تەڭگەدەن اسا قارجى ءتۇستى.
«جۇرگىزىلىپ جاتقان جۇمىس جالعا بەرىلەتىن پاتەرلەردە تۇراتىن ادامدار تۋرالى اقپارات الۋعا مۇمكىندىك بەرەدى. وتكەن جىلى ۋچاسكەلىك پوليتسيا ينسپەكتورلارى مەن استانا قالاسىنىڭ مەملەكەتتىك كىرىس دەپارتامەنتىنىڭ قىزمەتكەرلەرىنىڭ بىرلەسكەن ءىس-قيمىلىنىڭ ناتيجەسىندە قالا بيۋدجەتىنە 85600000 تەڭگە كىرىس ءتۇستى»، - دەپ مالىمدەدى استانا قالالىق ءى ءى د ءبولىم باستىعىنىڭ ورىنباسارى گوسمان جاكين.
