قىزىلوردا وبلىسىندا بالالار اراسىندا ءبىرجىنىستىق قاتىناستى ناسيحاتتايتىن ۆكونتاكتە جەلىسىنىڭ 18 پاراعى بۇعاتتالدى
بۇل تۋرالى جامبىل وبلىستىق پروكۋراتۋراسى الەۋمەتتىك- ەكونوميكالىق سالاداعى زاڭدىلىقتى باقىلاۋ باسقارماسى باستىعىنىڭ ورىنباسارى نۇربولات دۇيسەنوۆ ءمالىم ەتتى.
«بالالار اراسىنداعى ءبىرجىنىستى قارىم- قاتىناستى ناسيحاتتاۋ فاكتىلەرى دە تىركەلدى. ماسەلەن، ۆكونتاكتە الەۋمەتتىك جەلىسىنىڭ بالالار اراسىنداعى ءبىرجىنىستى قارىم- قاتىناستى ناسيحاتتايتىن، سونىمەن قاتار ءداستۇرلى ەمەس وريەنتاسياداعى ادامداردىڭ جىنىستىق قاتىناسىن كەڭىنەن سيپاتتايتىن 18 بەتى بۇعاتتالدى»، - دەدى ول.
ونىڭ ايتۋىنشا، ۆكونتاكتە الەۋمەتتىك جەلىسىنە جۇرگىزىلگەن كەزەكتى مونيتورينگ وبلىستىڭ 106 بالاسىنىڭ سۋيتسيدتى ناسيحاتتايتىن توپتارعا كىرگەندىگىن كورسەتكەن. مۇنان بولەك، قىزىلوردانىڭ 26 مەكتەبىنىڭ وقۋشىلارى ۇنەمى كىرەتىن ءسۋيتسيدتى ناسيحاتتاۋعا ارنالعان 13 قاۋىمداستىق بەلگىلى بولعان.
«Youtube جەلىسىندە «ءيت ءلاززاتى» (سوباچيي كايف) دەپ اتالاتىن كوپتەگەن بەينەروليكتەرگە كىرۋگە توسقاۋىل قويىلدى. وندا بالالار مەحانيكالىق قىلقىندىرۋ ارقىلى ۋاقىتشا ەستەن تانادى. «سۆينكا پەپا»، «پينگۆينى ماداگاسكارا» مۋلتفيلمدەرى، «ەرالاش»، «گاليلەو» باعدارلامالارىنا دىبىستىق مونتاج جاسالىپ، بوقتىق سوزدەر قوسىلعان. ولار ءتۇپنۇسقا سياقتى ميلليونداعان كورىلىم جيناۋدا»، - دەدى ول.
ونىڭ ايتۋىنشا، سايتتاردى بۇعاتتاۋ وڭ ناتيجە بەرەر ەمەس. ويتكەنى، جاڭا قوعامداستىق قۇرۋ جانە سول ارقىلى جارنامالاۋ ەش قيىندىق تۋدىرمايدى. سوندىقتان وبلىستاعى بارلىق مەكتەپتەردىڭ وقۋشىلارى مەن ۇستازدارىنا سمارتفون پايدالانۋعا تىيىم سالىنعان.
