ايگۇل يمانبايەۆا: 18 جاسىمدا سەزىم مەن سىيلاستىقتى شاتاستىردىم

مۇنىمەن قاتار، اكتريسانىڭ ءوزى دە وتكەن ومىرىندە بولعان وقيعالارعا ەش وكىنبەيتىنىن، ءسابيت ءابدىحالىقوۆتىڭ ەكىنشى وتباسىنا باقىت تىلەيتىنىن ايتتى.
«ءانشى ەمەسپىن، اكتريسامىن» دەپ ۇلى ونەردىڭ جۇگىن ارقالاعان ايگۇل يمانبايەۆانىڭ قازاق ساحناسىندا الار وزىندىك ورنى بار. ەركەلىگى وسە كەلە تايسالماس ەركىندىككە ۇلاسقان اكتريسانىڭ وبرازدارى سانقيلى.
ول - اكتريسا، ءانشى، تەلەارنالاردا جۇرگىزۋشى. ەڭ باستىسى، اياۋلى انا. بۇگىندە ءومىرىنىڭ مانىنە اينالعان اناسى 68 جاستا، ال جالعىز ۇلى اسىلجان 11 سىنىپتى بىتىرمەك. بالا بولاشاقتا كينو رەجيسسور ماماندىعىن يگەرسەم دەيدى.
يمانبايەۆا ءبىراز ۋاقىتقا دەيىن بالاسىنا اكەسىنىڭ كىم ەكەنىن ايتپاي جۇرگەن كورىنەدى. بۇل تۋرالى «ماما ەكەۋىمىز استاناعا پويىزبەن شىقتىق. سول ساتتە انام قولىما تۋۋ تۋرالى كۋالىگىمدى ۇستاتتى. ىشىندە ءسابيت ۇلى دەپ جازىلعانىن كوردىم. انامنىڭ بولات ەسىمدى جەزدەسى بولاتىن. سول كىسىنىڭ اتىنا نەگە جازىلماعانىمدى سۇرادىم. وسى كەزدە انام ءبىرىنشى رەت اكەم ءسابيت تۋرالى ايتىپ بەردى»، - دەپ اسىلجان اكەسىنىڭ باسقا ادام ەكەنىن بىلگەن كەزدە قاتتى تاڭقالعانىن جاسىرمادى.
ءوزىن اجەسى باۋىرىنا باسىپ وسىرگەنىن مويىنداسا دا، اناسىنا بارىنشا قولداۋ كورسەتۋگە تىرىسادى ەكەن.
«تاماعىن ىستەپ، قولىما كوتەرمەسەم دە، سىرقاتتانىپ قالعان كەزدە قاسىنان تابىلامىن. ىشىندەگىسىن شىعارعىسى كەلگەن كەزدە، وتىرىپ اڭگىمەسىن تىڭدايمىن»، - دەيدى يمانبايەۆانىڭ بالاسى.
يمانبايەۆا 2000-جىلدارى وتاندىق ارنالاردىڭ بىرىنەن كورسەتىلگەن «ۇيات بولماسىن» باعدارلاماسىندا كەلىننىڭ ءرولىن سومداعان بولاتىن. بۇل ۋاقىتتا اكتريسانى كوپ ادام بىلە بەرمەيتىن. تالاي ونەر مايتالمانىن تاربيەلەپ شىعارعان كاۋكەن كەنجەتايەۆتىڭ سىناعىنان وتكەن ارۋ ءبىلىم شاڭىراعىنا تۇسەدى. كوپ جىگىتتىڭ ارمانى بولسا كەرەك، نەبارى 20 جاستان اسار شاعىندا تۇرمىسقا شىعادى.
«ءدال سول مەنىڭ 17-18 جاسىمدا سىيلاستىق پەن سەزىمدى شاتاستىرىپ الدىم. ءبىر-ءبىرىمىزدى كورگەن كەزدە ەلەڭ ەتەتىندەي ماحاببات بولمادى. شىنىمدى ايتايىن، ەكەۋىمىز ءبىر باعىتقا قاراي المادىق. شىعارماشىلىق تاندەم كۇشتى بولدى، ءبىراق ومىردە مۇلدەم ەكى كوزقاراستاعى ادامدارمىز. ءسابيت پەن التىنايدىڭ ءتورت قىزىن جاقسى كورەمىن. مۇنى جاسىرمايمىن. اسىرەسە، سيمانۋرسىن. ءومىر قىسقا، ءبىز ماڭگىلىك ەمەسپىز. كۇندەسىپ، ايعايلاسىپ، جۇلىسىپ، تارتىسىپ جۇرگەننەن نە پايدا؟! بۇگىن بولماسا، ەرتەڭ كەز كەلگەنىمىز باقيلىق بولۋىمىز مۇمكىن»، - دەپ اكتريسا ءومىرىن وكىنىشپەن وتكىزگىسى كەلمەيتىنىن ايتتى.
بۇگىنگى تاڭدا ايگۇل يمانبايەۆا وتاندىق ارنالارداعى باعدارلامالاردى جۇرگىزەدى. ءوزىنىڭ «Ai-studio» اتتى جەكەمەنشىك مەكتەبى دە بار.
stan.kz