الماتىدا جەدەل جاردەم دارىگەرلەرىنە 18 رەت شابۋىل جاسالعان
بۇل تۋرالى قالالىق جەدەل جاردەم ستانساسىنىڭ باس دارىگەرى ءبىرجان وسپانوۆ ايتتى.
«تاڭعى 4 تەن باستاپ ءبىز ءوزىمىزدىڭ ارىپتەسىمىزدىڭ ءومىرىن اراشالاپ قالۋعا تىرىسىپ جاتىرمىز. دارىگەر ناۋقاستى قاراپ جاتقان كەزدە ونىڭ تانىسى كىرىپ دارىگەردى شۇيدەسىنەن تاسپەن ۇرعان. بىردەن وتا جاسالدى. باس سۇيەگىن اشىپ گەماتومانى الدىق. قازىر دە جاعدايى وتە اۋىر، ەس-ءتۇسسىز جاتىر»، - دەدى ءبىرجان وسپانوۆ.
ونىڭ قاسىندا بولعان فەلدشەر قىز دا جابىق مي جاراقاتىمەن قالالىق جەدەل جاردەم اۋرۋحاناسىندا جاتىر.
ءبىرجان وسپانوۆتىڭ ايتۋىنشا، بيىلدىڭ وزىندە جەدەل جاردەم ستانساسىنىڭ دارىگەرلەرىنە 18 رەت شابۋىل جاسالعان.
شابۋىل جاساۋشىلاردىڭ ىشىندە كوبىنە ماس كۇيىندە ءارى ەسىرتكى شەگىپ العان ادامدار، دارىگەرلەرمەن سوزگە كەلگەن تۋىسقاندار بار.
قالالىق باسقارمانىڭ ەمدەۋ-پروفيلاكتيكالىق ءبولىمىنىڭ باسشىسى بايزولدانوۆا ايماننىڭ ايتۋىنشا، ۋچاسكەلىك دارىگەرلەرگە بىرنەشە رەت قاستاندىق جاسالعان.
«ونداي جاعداي بولدى. كوبىنە ۋچاسكەلىك دارىگەرلەر - ايەل ادامدار ۇشىرايدى. ولار بۇل ماسەلەنى سىرتقا جاريالاعىسى كەلمەيدى. ءسويتىپ جابۋلى قازان جابۋلى قالىپ جاتىر. سونداي-اق، دارىگەرلەر جەكە ۇيلەرگە بارعاندا يتتەردەن قورعانۋعا ءماجبۇر. وسىنداي جاعدايلاردىڭ سانى كۇننەن كۇنگە ارتىپ كەلەدى»، - دەيدى ول.
مامانداردىڭ ايتۋىنشا، اگرەسسيۆتى ادامدار اۋرۋحانالاردا دا كەزدەسەدى.
«وتكەندە اۋرۋحاناعا بالاسىن جاتقىزۋعا كەلگەن انا شۋ شىعارىپ، دارىگەرلەردى بالاعاتتاپ، قول كوتەردى. پروكۋراتۋراعا ارىز جازدىق. جىل باسىنان بەرى ۇجىمنىڭ اتىنان(اۋىزشا نەمەسە جازباشا مالىمدەمە - رەد.) 7 رەت راپورت جازىلدى»، - دەدى 2 قالالىق بالار اۋرۋحاناسىنىڭ باس دارىگەرى ەرمەك ايازبەكوۆ.
اۆتور: گۇلميرا عوسمان-ءالي
