جامبىلدىق بويجەتكەن نەبارى 18 جاسىندا ءوز كاسىبىن اشىپ، اۋىلداستارىن تاڭ قالدىرۋدا

استانا. قازاقپارات - بۇگىندە جامبىل وبلىسىندا كاسىپكەرلىكتىڭ كوكجيەگىن كەڭەيتىپ، ءوز تىرلىگىن تىكتەپ جۇرگەن ازاماتتار از ەمەس.

اسىرەسە كەيىنگى جىلدارى بۇل باعىتقا بەت بۇرعان جاستار جاعىنىڭ ۇلەس سالماعى ايتارلىقتاي ارتىپ كەلەدى.

ونداي تىرلىكتىڭ كوزىن تاۋىپ، كاسىبىن دومالاتىپ وتىرعان ەڭ جاس كاسىپكەر اۋليەاتا وڭىرىندە ەڭبەك ەتۋدە. نازەركە كابيرايەۆا ءوز كاسىبىن نەبارى 18 جاسىندا اشقان.

تالاس اۋدانى، قاراتاۋ قالاسىنىڭ تۋماسى نازەركە مەيرامبەك قىزى قازىرگى تاڭدا وبلىسىمىزداعى ەڭ جاس كاسىپكەر. 1995 -جىلى تۋىلعان ول 2013 -جىلى قاراتاۋ قالاسىندا ەڭ العاش كاسىبىن باستاعان. سول جىلى كاسىپكەرلەردى قولداۋ باعدارلاماسى اياسىندا جاريالانعان كونكۋرسقا قاتىسىپ، 1 ميلليون 700 مىڭ تەڭگە كولەمىندەگى گرانتتى جەڭىپ العان.

وسىلايشا جالىندى جاس ءوز جوباسىن جۇزەگە اسىرىپ، مونوقالادان العاشقى بولىپ فاستفۋد تۇرىندەگى دەمالىس ورنىن اشادى. نازەركەنىڭ ايتۋىنشا، مۇنداي يدەيا وعان استاناعا بارعان ساپارىندا تۋعان ەكەن.

«نەگىزى ۇلكەن قالالارعا بارعان سايىن تەز ءارى ءدامدى دايىندالاتىن فاستفۋد دۇڭگىرشەكتەرىنە سوعىپ، تاماقتاناتىنمىن. ءبىر كۇنى استانا قالاسىندا وسىنداي فاستفۋد ساۋدا ورنىن كافە تۇرىندە اشىپ قويعانىن كوردىم. بىردەن نەگە ءبىزدىڭ قاراتاۋ قالاسىندا دا وسىنداي كافە اشپاسقا دەگەن وي تۋدى. سودان «نەسىبەلى» جەكە كاسىپكەرلىگىن اشىپ، 2013 -جىلى كاسىپكەرلىكتى قولداۋعا جاريالانعان كونكۋرسقا قاتىستىم. جالپى بۇل كونكۋرستىڭ جەڭىمپازىنا 3000000 تەڭگە كولەمىندە گرانت بەرىلەتىن بولعان. الايدا جەڭىمپازدىڭ قولىندا سول سومانىڭ 20 پايىزى بولۋى كەرەك ەدى. ءبىراق مەندە بار-جوعى 400 مىڭ تەڭگە بولعاندىقتان، 1 ميلليون 700 مىڭ تەڭگە كولەمىندەگى گرانتقا عانا يە بولدىم. دەسە دە، بۇعان دا شۇكىرلىك ەتىپ، تىرلىكتى باستاپ كەتتىم»، - دەيدى ول.

«اكەم قوسىمشا 1,5 ميلليون تەڭگە نەسيە الىپ بەرىپ، قاجەتتى قۇرال-جابدىقتاردى تولىقتاي ساتىپ الدىم. سودان قاراتاۋ قالاسىندا «نەسي-دونەر» جاستار كافەسى دۇنيەگە كەلىپ، بۇگىندە قارقىندى جۇمىس جاساپ جاتىر»، - دەيدى جاس كاسىپكەر.

قازىر نازەركەنىڭ دەمالىس ورنى ءۇش ادامدى تۇراقتى جۇمىسپەن قامتىپ وتىر. سونداي-اق، جاس كاسىپكەر ءۇشىنشى توپتاعى مۇگەدەكتەردى، ورالمانداردى جۇمىسپەن قامتۋعا كۇش سالىپ ءجۇر ەكەن. اراسىندا ءوزى دە تاعام ازىرلەپ، تىرشىلىكتىڭ قازانىن قايناتۋدا.

بۇدان بولەك، نازەركەنىڭ «نەسي-دونەرى» قىرىق ادامعا ارنالعان مەرەكەلىك كەشتەردى دە وتكىزۋگە قولايلى. الايدا ول دەمالىس ورنىندا سپيرتتىك ىشىمدىكتەردى مۇلدە ساتپايدى ەكەن. جانە قۋانىش يەلەرىنە دە وزىمەن بىرگە ىشىمدىك اكەلۋگە تىيىم سالىنعان. ارينە، بۇل - قۇپ كورەتىن يماندى ءىس. ءارى مۇنداي باستامانى جاس كاسىپكەردىڭ كوتەرىپ وتىرعانى كوپكە ۇلگى ەكەنى انىق.

ەندى نازەركە ءوزىنىڭ دەمالىس ورنىن كەڭەيتىپ، بالالارعا ارنالعان ارنايى بولمە اشسام دەپ ارماندايدى. الايدا ول ءۇشىن كوپ قارجى قاجەت. قازىرگى نىسانىنىڭ ءوزىن جاس كاسىپكەر جالعا الىپ، اي سايىن 100 مىڭ تەڭگەسىن تولەپ وتىر. سوندىقتان نازەركە قارجىلاي قولداۋعا مۇقتاج.

ءوزى نەسيە الايىن دەسە، جاسى جيىرما بىرگە تولماعاندىقتان، كرەديتكە قول جەتكىزە الماۋدا. دەگەنمەن، جاس كاسىپكەر لوندون، رەسەي، ءتىپتى افريكا ەلدەرىنە دەيىن عالامتور ارقىلى بايلانىسقا شىعىپ، تومەندەتىلگەن پايىزبەن نەسيە الۋعا تالپىنىپ كورگەن ەكەن. الايدا ونداعىلار الاياق بولىپ شىعىپ، الدىن الا توككەن قارجىسىن دا قايتارا الماي قالعان كورىنەدى.

«قازىر ماعان بار كەدەرگى بولىپ تۇرعانى - جاسىمنىڭ جيىرما بىرگە جەتپەۋى. ايتپەسە، جۇزەگە اسىراتىن جوبالارىم جەتەرلىك. قازىر «نەسي-دونەردەن» بولەك، جەكە كاسىپكەر رەتىندە مەكتەپتەرگە قاجەتتى قۇرال-جابدىقتار، قۇرىلىس ماتەريالدارى، كيىم-كەشەك سىندى تاۋارلاردىڭ دا تەندەرىنە قاتىسىپ ءجۇرمىن. بۇدان بولەك، جاستار ورتالىقتارىنىڭ لاگەرلىك دەمالىستارىن ۇيىمداستىرۋدى دا بيىل ۇتىپ الدىم. سونداي-اق، سۋسىز كولىك پەن ىدىس-اياق جۋۋعا بولاتىن جاڭا تەحنولوگيا ويلاپ تاپتىم. مىنە، وسىلاردىڭ بارلىعىن جۇزەگە اسىرۋ ءۇشىن ماعان نەسيە الۋعا مۇمكىندىك قاجەت»، - دەيدى نازەركە.

جاس كاسىپكەردىڭ تاعى ءبىر تىڭ جوباسى - قاراتاۋ قالاسىنان كومپلەكستىك تۇسكى اس ازىرلەۋ ءدامحاناسىن اشۋ. قازىر نازەركە وسى جوباسىن جۇزەگە اسىرۋ ءۇشىن كۇش سالىپ جاتىر.

نازەركەنىڭ ومىرلىك قاعيداتى - ەشتەڭەدەن قورىقپاي، تاۋەكەل ەتۋ.

دەرەككوز: «قازاقستان- زامان» گازەتى