بايقوڭىر: «سويۋز ت م ا-18م» باسقارىلاتىن كەمەسىنىڭ ەكيپاجى ۇشۋعا ءازىر! - فوتو
بۇل كۇنى ح ع س- عا 45-46- ەكسپەديتسيانىڭ كومانديرى رەسەيلىك سەرگەي ۆولكوۆ، بورتينجەنەرلەر - دات وكىلى اندرەاس موگەنسەن جانە قازاقستاندىق ايدىن ايىمبەتوۆ ۇشۋعا دايارلىقتارى جونىندە ءۇش رەت باياندادى.
رەسەيلىك فەدەرالدىق عارىش اگەنتتىگىنىڭ باسشىسى الەكساندر يۆانوۆ باستاعان مەملەكەتتىك كوميسسيا ولاردىڭ ەكيپاجىن ح ع س- قا ۇشىرۋ جونىندە تۇپكىلىكتى شەشىم قابىلدادى.
ۇشىرۋ الدىنداعى باسپا ءسوز ءماسليحاتىندا جۋرناليستەردى ەكيپاجدىڭ ۇشۋعا ازىرلىگى قىزىقتىردى، ويتكەنى كوماندانىڭ ەكى مۇشەسى عارىشقا العاش رەت ۇشقالى وتىر.
كەمە كومانديرى رەسەيعارىش عارىشكەرى سەرگەي ۆولكوۆ بۇل جولى عارىشقا ءۇشىنشى رەت ساپار شەككەلى تۇر، ول ءوز ارىپتەستەرىنىڭ ازىرلىگى دەڭگەيىن جوعارى باعالادى جانە «گاگارين الاڭىنان» ۇشاتىن 500- مەرەيتويلىق ۇشىرۋ ويداعىداي وتەتىنىنە سەنىمىن ءبىلدىردى.
سەرگەي ۆولكوۆ «جاڭا» عارىشكەرلەردى الىپ ۇشۋمەن قاتار، كەلەسى جىلدىڭ ناۋرىز ايىندا كەمە كومانديرى رەتىندە ءبىر جىل بويى ستانسادا جۇمىس جاساپ جاتقان ميحايل كورنيەنكو مەن سكوتت كەلليدى جەرگە الىپ قايتپاق.
سەرگەي ۆولكو ح ع س بورتىنداعى ۇلكەن عىلىمي باعدارلاما جونىندە ايتا كەلىپ، ونىڭ ەۋروپالىق، قازاقستاندىق جانە رەسەيلىك عىلىمي باعدارلامالار بويىنشا جۇرگىزىلەتىنىن اتاپ ءوتتى.
ەۋروپالىق عارىش اگەنتتىگىنىڭ استروناۆى اندرەاس موگەنسەن باسپا ءسوز ءماسليحاتى كەزىندە عارىشقا ۇشۋدى كوپتەن بەرى ارمانداعانىن جانە دانيانىڭ العاشقى استروناۆتى بولاتىنىن ماقتان ەتەتىنىن ايتتى.
قازعارىش عارىشكەرى ايدىن ايىمبەتوۆ عارىشقا كىشكەنتاي قىزى دايانا تىككەن ويىنشىقتى وزىمەن بىرگە الا كەتەتىنىن ايتتى. سونىمەن بىرگە قازاقستاندىق عارىشكەر ق ر مەملەكەتتىك رامىزدەرىن الا جۇرەدى. «ق ر كونستيتۋتسياسىنىڭ مەرەيتويىنا وراي مەملەكەتتىك تۋ مەن نەگىزگى زاڭ ءماتىنىن الا كەتەمىن»، - دەدى ول.
ۇشۋ الدىنداعى كۇنى ەكيپاج مۇشەلەرى ق ر پرەمەر- ءمينيسترىنىڭ ورىنباسارى بەردىبەك ساپاربايەۆپەن كەزدەستى، ول بايقوڭىر عارىش ايلاعىنا قۇرامىندا قازاقستاندىق عارىشكەر بار ەكيپاجدىڭ ۇشىرىلۋىن باقىلاۋعا ارنايى كەلگەن بولاتىن.
«يۋبيلەينىي» اۋەجايىندا قازاقستاندىق ۆيسە- پرەمەردى «بايقوڭىر» عارىش كەشەنىنىڭ باسشىلارى، قازعارىش باسشىسى تالعات مۇسابايەۆ، قىزىلوردا وبلىسىنىڭ اكىمى قىرىمبەك كوشەربايەۆ قارسى الدى.
ۇكىمەتتىك دەلەگاتسيا بىردەن بايقوڭىر قالاسىنداعى «كوسموناۆت» قوناقۇي كەشەنىنە تارتتى، مۇندا عارىشكەرلەر مەن استروناۆتار ەكى اپتا بويى ۇشۋعا دايارلانىپ جاتقان بولاتىن.
ب. ساپاربايەۆ ق ر پرەزيدەنتىنىڭ جانە بۇكىل قازاقستاندىق حالىق اتىنان بايقوڭىر عارىش ايلاعىنان 2015 - جىلعى 2 - قىركۇيەكتە ۇشىرىلاتىن ەكيپاجدى قۇتتىقتادى.
«ءسىزدىڭ اكەڭىز الەكساندر ۆولكوۆ ءبىزدىڭ العاشقى قازاق عارىشكەرى توقتار اۋباكىروۆ ۇشقان ەكيپاجدىڭ كومانديرى بولعان ەدى، ەندى ءسىز وسى ەستافەتانى جالعاستىرىلىپ، ءبىزدىڭ ايدىن ايىمبەتوۆ ۇشاتىن ەكيپاجدىڭ كومانديرى بولىپ وتىرسىز»، - دەدى ۆيتسە- پرەمەر سەرگەي ۆولكوۆقا قاراتا ايتقان سوزىندە.
ول عارىشتىق ۇشۋدىڭ جاڭا مۇشەلەرى العاشقى دات عارىشكەرى اندرەاس موگەنسەن مەن ق ر- نىڭ سىناۋشى- عارىشكەرى ايدىن ايىمبەتوۆكە ءسات ساپار تىلەدى.
قازعارىش باسشىسى تالعات مۇسابايەۆ قازاقستاننىڭ ۆيسە- پرەمەرىنە ح ع س بورتىنا ايدىن ايىمبەتوۆ قازاقستان رەسپۋبليكاسىنىڭ تۋىن، قازاقستان حالقى اسسامبلەياسى مەن «ەكسپو-2017» حالىقارالىق كورمەسىنىڭ جالاۋلارىن الىپ ۇشاتىنىن حابارلادى.
بەردىبەك ساپاربايەۆ قازاق حاندىعىنىڭ 550 جىلدىعى قۇرمەتىنە ەكيپاج مۇشەلەرىنە تاريحي مەرەيتويلىق مەدالداردى تاپسىردى.
«مەن ەلىمىزدە عارىش قىزمەتىن دامىتۋ جاقسى قارقىنمەن ءجۇرىپ جاتقانىنا قۋانىشتىمىن، بۇل جولعى ۇشىرۋ سونىڭ ايقىن ايعاعى»، - دەدى ب. ساپاربايەۆ.
ۇشىرۋعا ءۇش ساعات بۇرىن 07 ساعات 40 مينۋتتا سەرگەي ۆولكوۆ، اندرەاس موگەنسەن جانە ايدىن ايىمبەتوۆ ۇشىرۋ الاڭىنا شىعىپ، بايقوڭىرعا كەلگەن كوپتەگەن قوناقتاردىڭ الدىندا مەملەكەتتىك كوميسسياعا عارىشقا ۇشۋعا ءازىر ەكەندىكتەرىن باياندادى.
08.00-08.30-دا ەكيپاج كەمەگە وتىردى. «سويۋز ت م ا-18م» عارىش كەمەسىنىڭ ۇشۋى استانا ۋاقىتىمەن 10 ساعات 37 مينۋتقا جوسپارلانىپ وتىر. بۇل «سويۋز» زىمىران- تاسىعىشىنىڭ 500- مەرەيتويلىق ۇشىرىلۋى بولماق.
«سويۋز ت م ا-18م» كەمەسىنىڭ ح ع س- مەن ءتۇيىسۋى ەكى تاۋلىكتەن كەيىن بولادى، اندرەاس موگەنسەن مەن ايدىن ايىمبەتوۆ وربيتادا جۇمىس جاساپ جاتقان رەسەيلىك عارىشكەر گەننادي پادالكامەن بىرگە جەرگە 12 - قىركۇيەكتە ورالادى.
الەمدىك كوسموناۆتيكانىڭ وتانىنا اينالعان قازاق جەرى ءوزىنىڭ ۇلدارىنىڭ عارىشتىق ميسسياسىن ويداعىداي ورىنداپ ورالۋىن اسىعا كۇتەتىن بولادى.