الماتىدا سىبايلاس جەمقورلىق دەرەگىمەن 18 لاۋازىمدى تۇلعا قىلمىستىق جاۋاپكەرشىلىككە تارتىلدى
بۇل تۋرالى بۇگىن عىلىم ورداسى عيماراتىندا وتكەن 2015-2020 -جىلدارعا ارنالعان سىبايلاس جەمقورلىققا قارسى كۇرەس ستراتەگياسىن تالقىلاۋعا ارنالعان جيىن بارىسىندا ءمالىم بولدى.
ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتى باسشىسىنىڭ ورىنباسارى باقتيار قامالوۆتىڭ ايتۋىنشا، «قىزمەتتىك لاۋازىمىن» بوتەن ماقساتتا پايدالانعان قىزمەتكەرلەردىڭ 5 ى پارا الىپ جاتقان جەرىنەن ۇستالعان.
ولار مەملەكەتكە 54 ميلليون 943 مىڭ تەڭگە كولەمىندە شىعىن كەلتىردى. قازىر بۇل قارجى تۇگەلىمەن مەملەكەت بيۋدجەتىنە اۋدارىلدى. سونداي-اق، جىل باسىنان بەرى سىبايلاس جەمقورلىققا ىقپال ەتەتىن جاعداي تۋدىرعانى ءۇشىن 15 لاۋازىمدى تۇلعا تارتىپتىك جاۋاپكەرشىلىككە تارتىلدى.
«ق ر پرەزيدەنتى نۇرسۇلتان نازاربايەۆ «نۇر وتان» پارتياسىنىڭ 16-سەزىندە مەريتوكراتيا قاعيداتتارىن قورعاۋ جانە سىبايلاس جەمقورلىقتىڭ الدىن الۋ مەن ونى بولدىرماۋدى جولعا قويۋ ماڭىزدى دەپ ايتقان بولاتىن. سىبايلاس جەمقورلىق ەلدىڭ الەۋمەتتىك- ەكونوميكالىق دامۋىنا، دەموكراتيالىق مەملەكەتتىڭ ساياسي جانە قوعامدىق ينستيتۋتتارىنا كەرى اسەر ەتىپ، ەلدىڭ دامۋىنا ءقاۋىپ توندىرەتىنى انىق. بۇل ورايدا 2014 -جىلدىڭ جەلتوقسان ايىندا سىبايلاس جەمقورلىقپەن كۇرەس ستراتەگياسى قابىلدانىپ، وندا جەمقورلىقتى بولدىرماۋ، ونى تۋدىراتىن جايتتاردىڭ الدىن الۋ تەتىكتەرى كورسەتىلگەن»، - دەدى باحتيار كامالوۆ.
مامانداردىڭ ايتۋىنشا، بۇگىنگى وتىرىس بارىسىندا جەڭ ۇشىنان جالعاسقان جەمقورلىقتىڭ الدىن الۋدىڭ جاڭا تەتىكتەرى ۇسىنىلدى.
«بۇگىنگى ءوتىپ جاتقان وتىرىس جەمقورلىققا قارسى كۇرەستىڭ جاڭا تەتىكتەرىن قاراستىرۋعا باعىتتالعان. مەملەكەت باسشىسى جاقىندا 5 ينستيتۋتسيونالدى رەفورمانى ىسكە اسىرۋدى تاپسىرعان بولاتىن. 100 ناقتى قادام دا جاريا ەتىلدى. «نۇر وتان» پارتياسى دا «نۇرلى جول» باعدارلاماسىندا كورسەتىلگەن ماقساتتى ينديكتاتورلارعا جەتۋ ءۇشىن جۇيەلى تۇردە جۇمىس جاساپ كەلەدى»، - دەدى «نۇر وتان» پارتياسىنىڭ الماتى قالالىق بولىمشەسى ءتوراعاسىنىڭ ورىنباسارى ستانيسلاۆ كانكۋروۆ.
اۆتور: گۇلميرا عوسمانالي
