مۇسىلمان الەمى ءۇشىن ون ەكى ايدىڭ سۇلتانى - رامازان ايى 18- ماۋسىمدا باستالادى

استانا. قازاقپارات - تۋرا 29 كۇننەن كەيىن ءيىسى مۇسىلمان قاۋىم قاسيەتتى رامازان ايىن قارسى الادى.

وسىعان وراي بۇگىن قازاقستان مۇسىلماندارى ءدىني باسقارماسى وكىل يمامداردى جيناپ، ءماجىلىس وتكىزدى. باس ءمۇفتي ەرجان مالعاجى ۇلىنىڭ قۇتتىقتاۋىمەن باستالعان جيىندا قاجىلىق، ۋاعىز-ناسيحات جۇمىستارى، ءپىتىر ساداقا مولشەرى، مەشىتتەرگە ات قويۋ جانە يمامدارعا ءبىرىڭعاي شاپان ۇلگىسىن بەكىتۋ سىندى 12 ماسەلە ورتاق تالقىعا سالىندى. قاتىسۋشىلاردىڭ قولداۋىمەن بەكىتىلگەن ءپاتۋاعا بايلانىستى ءپىتىر ساداقا كولەمى ناقتىلانىپ، كيىم كيىس ۇلگىسى دە بىرىزدەندىرىلدى.

وعان سايكەس، وبلىس يمامدارىنىڭ ورىنباسىلارىنان باستاپ اۋىل مولدالارىنا دەيىن ءبىر ۇلگىدە كيىنەدى. بارلىعىنىڭ شاپاندارى ءبىر تاپسىرىسپەن تىگىلگەن. سونداي-اق تاياۋدا سۋ تاسقىنىنان زارداپ شەككەندەر ماسەلەسى دە شەت قالعان جوق. ءماجىلىس قورىتىندىسى بويىنشا، قايىرىمدىلىق مولشەرى انىقتالماق.

سەرىكباي قاجى وراز، قازاقستان مۇسىلماندارى ءدىني باسقارماسىنىڭ نايب ءمۇفتيى:

- ءدىني باسقارمانىڭ بۇگىنگى وتىرىسىندا ءپىتىر ساداقا مولشەرى 200 تەڭگە كولەمىندە بەلگىلەندى. باس ءمۇفتي ەرجان قاجى مالعاجى ۇلى رامازان ايىندا ورىندالاتىن يگى ىستەردى العا تارتىپ، بارشا قازاقستاندىقتاردى تابيعي اپاتتان زارداپ شەككەن جاندارعا قايىرىمدىلىق كورسەتۋگە ۇندەدى.

www.24.kz