گەرمانيادا 18 ميلليون جۇمىسشىنىڭ ورنىن روبوتتار باسۋى مۇمكىن

استانا. قازاقپارات -   بۇل -  الداعى جىلدارعا جاسالىنعان بولجام. اۆتوماتتاندىرىلعان ماشينالار بىرتىندەپ ەنگىزىلمەك. الايدا قوعام بۇل جاعدايعا الاڭداۋشىلىق ءبىلدىرىپ وتىر.

سەبەبى ەڭبەككە جارامدى حالىقتىڭ %59- ى جۇمىسسىز قالۋى مۇمكىن.

ول قامىر يلەپ، ءتىپتى سۋشي جاساي الادى. تاماقتىڭ ءتۇر- ءتۇرىن ەش قيىندىقسىز ازىرلەپ، داستارحانعا دەيىن جايىپ بەرەدى. اسپازشى- قۇلتەمىردىڭ پىسىقتىعى ەڭ تاجىريبەلى ءۇي شارۋاسىنداعى ايەلدەن كەم تۇسپەيدى. تاعام دايارلاۋدى تەك ءبىر رەت كورىپ السا بولعانى.

 تيم اندەرسەن، باس اسپازشى:

- باسىندا كارتوپتان جاسالاتىن كوجەنى ءوزىم ءپىسىردىم. سول كەزدە تەتىكتەر مەن D3 كامەراسى مەنىڭ بارلىق قيمىلىمدى جازىپ الدى. كەيىننەن قۇلتەمىر مەنىڭ قوزعالىسىمدى اۋدىرتپاي قايتالاپ بەردى. وتە كەرەمەت. وعان الەمنىڭ بارلىق رەتسەپتتەرىن جازۋعا بولادى.

 بولاشاقتا اسپازشىلاردىڭ تاماق تالعاعىشتاردى الىستا ءجۇرىپ- اق تاماقتاندىرۋى ابدەن مۇمكىن. روبوتتار الدەن اسپازشى، تاكسي جۇرگىزۋشىلەرى، جۇك تاسۋشىلار مەن ۇشقىشتاردىڭ جۇمىسىن اتقارا الادى. الايدا عىلىمي- تەحنيكالىق ورلەۋگە نەمىستەر اسا رازى ەمەس. الداعى ۋاقىتتا اۆتوماتتاندىرىلعان ماشينالاردىڭ سالدارىنان 18 ميلليون جۇمىسشى قىزمەتىنەن ايىرىلۋى مۇمكىن. ساراپشىلاردىڭ زەرتتەۋ جۇمىستارىنا قاراعاندا، 2 ميلليونعا جۋىق كەڭسە قىزمەتكەرلەرى قىسقارۋى ىقتيمال. سونداي- اق 1,5 ميلليونعا جۋىق حات تاسۋشى مەن 1 ميلليوننان استام ساتۋشى جۇمىسسىز قالماق.

 ۋتە، بەرلين قالاسىنىڭ تۇرعىنى:

- مەن كونديتەرلىك كومپانيادا جۇمىس ىستەيمىن. تورتتار مەن بالىشتەردى جاقسى كورەمىن. بۇل مەنىڭ سۇيىكتى ءىسىم. ەگەر قىسقارىپ قالسام، جانىما باتاتىنى ءسوزسىز.

شىندىعىندا روبوت بارلىق سالانى بىردەي مەڭگەرە المايدى. ولار دارىگەر، حيميا نەمەسە فيزيكا ماماندارىنىڭ ورنىن باسا المايدى. ال جۇمىس بەرۋشىلەر، ارينە، جاڭا تەحنولوگيانى قولدايدى. سەبەبى جۇمىس ۋاقىتى 8 ساعاتپەن عانا شەكتەلىپ قويمايدى. ەرەۋىلدەرگە دە شىقپايدى. ازىرگە ءىرى دەگەن كاسىپورىنداردىڭ ءوزى اۆتوماتتانداندىرىلعان وندىرىسكە كوشە المايدى. الايدا بۇل -  ۋاقىتتىڭ ەنشىسىندەگى ماسەلە.

www.24.kz