جۇمىسقا قابىلداۋ بارىسىندا 18 جاسقا تولماعانداردى سىناق مەرزىمى بولمايدى

استانا. قازاقپارات - بۇگىن پارلامەنت ءماجىلىسىنىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسىنىڭ ەڭبەك كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ەكىنشى وقىلىمدا ماقۇلدادى.

بۇل قۇجات «مەملەكەتتىك جاستار ساياساتى تۋرالى» زاڭ جوباسىنا ىلەسپە قۇجات بولىپ تابىلادى جانە ول بويىنشا 18 جاسقا تولماعاندار ءۇشىن جۇمىسقا قابىلداۋدا سىناق مەرزىمى قاراستىرىلمايتىن نورما قامتىلىپ وتىر.

بۇدان بولەك، زاڭ جوباسى بويىنشا جۇمىسقا العاش كىرگەن جاس مامانعا ەكى جىلدان كەم بولمايتىن مەرزىمگە ەڭبەك شارتىن جاساۋ تۋرالى نورما ەنگىزىلىپ وتىر. سونىمەن قاتار، 18 جاسقا تولماعان جاستارعا، سونىمەن بىرگە تەحنيكالىق جانە كاسىبي ورتا بىلىمنەن كەيىنگى جوعارى وقۋ ورنىنان كەيىنگى ءبىلىم بەرۋ ۇيىمدارىندا وقۋ ءبىلىم باعدارلامالارىن يگەرگەن، ولاردى بىتىرگەن كۇننەن باستاپ 1 جىلدان كەشىكتىرمەي العان ماماندىعى بويىنشا جۇمىسقا العاش كىرەتىن ماماندارعا سىناق مەرزىمى بەكىتىلمەيدى.

تۇتاستاي العاندا زاڭ جوباسى جاستاردىڭ ەڭبەك سالاسىنداعى قۇقىقتارىن قورعاۋعا باعىتتالادى. بۇدان بولەك، زاڭ جوباسىندا جاس ماماندارمەن ەڭبەك كەلىسىمشارتىن جاساسۋ مەرزىمى قامتىلىپ، سىناق مەرزىمى قاراستىرىلمايتىن ساناتتار كەڭەيتىلدى.

ءماجىلىس ماقۇلداعان زاڭ جوباسى سەناتقا جولدانادى.

اۆتور: قانات مامەتقازى ۇلى