ءولىم جازاسىنا كەسىلگەن قىتايلىق جىگىتتىڭ 18 جىلدان كەيىن كىناسىز ەكەنى انىقتالدى
سوت جازىقسىز جازاعا تارتىلعان جىگىتتىڭ تۋعان-تۋىستارىنان كەشىرىم سۇرادى، دەپ جازادى دۇيسەنبى كۇنى South China Morning Post باسىلىمى.
ءولىم جازاسىنا كەسىلگەن حۋۋگدجي (Huugjilt) ەسىمدى جىگىتكە ايەل ادامدى زورلاپ، ارتىنشا ءولتىردى دەگەن ايىپ تاعىلعان بولاتىن. ىشكى موڭعوليا جوعارى سوتى تەك 18 جىلدان كەيىن جىگىتتىڭ جازىقسىز ەكەنىن انىقتادى.
مۇنداي جاڭا ۇكىمگە قازا بولعان جىگىتتىڭ دوسى يان فەننىڭ (Yan Feng) مالىمدەمەسى ارقاۋ بولعان. ول حۋح-حوتو (Hohhot) قالاسىندا قوعامدىق دارەتحانالاردىڭ بىرىندە ايەل ادامنىڭ داۋىسىن ەستىگەن ساتتە حۋۋگدجيدىڭ قاسىندا بولعان.
يان فەن پالەسىنەن اۋلاق دەپ ءوتىپ كەتپەك بولعاندا، دوسى بەيشارا ايەلگە كومەككە كەلمەك بولعان ەكەن. ول از دەگەندەي، يان فەن قانشا رەت قارسى بولعانىنا قاراماستان، بولعان وقيعانى بايانداپ بەرۋ ءۇشىن پوليتسياعا ءوزى حابار بەرىپتى.
2005 - جىلى بىرنەشە رەت زورلىق جاساپ، ادام ولتىرگەن قىلمىسكەر جاۋ جيحۋن قولعا تۇسكەننەن كەيىن حۋۋگدجيدىڭ جازاسىنا سەبەپ بولعان ايەلدى زورلاپ، ولتىرگەنىن مويىنداپتى.
سوعان قاراماستان، ءىستى قايتا قاراۋ تەك جاقىندا عانا قولعا الىنعان ەكەن. جازىقسىز ءولىم جازاسىنا كەسىلگەن جىگىتتىڭ تۋىستارىنىڭ مۇددەسىن قورعاۋشى ادۆوكات ەندى وسى قاتەلىگى ءۇشىن ۇكىمەتتەن وتەماقى تالاپ ەتۋگە وقتالىپ وتىرعانىن جەتكىزدى.
ىشكى موڭعوليا جوعارعى سوتى كوڭىل ايتۋ يشاراسى رەتىندە قازا بولعان جىگىتتىڭ وتباسىنا 30 مىڭ يۋان كولەمىندە جاردەماقى جونەلتتى.
BNews.kz
