ماڭعىستاۋدا 18 بالانى دۇنيەگە اكەلگەن باتىر انا تۇرادى
تۇردىگوزەل اياعۇتوۆا بالالارىنا جاقسى تاربيە بەرىپ، ۇلىن ۇياعا، قىزىن قياعا قوندىرعان اسىل جان.
كوپ بالالى انانىڭ ءتالىمى بۇگىندە كەلىندەرىنە ۇلگى-ونەگە بولىپ وتىر. تۇردىگوزەل اپا قازىر 63 كە كەلدى. دۇنيەگە اكەلگەن 18 بالاسى ءبىر-ءبىر شاڭىراق يەسى.
ىشىندە 5 بىردەي ەگىزى دە بار. ءبۇتىن ءبىر اۋلەتتىڭ وتاناسى بۇگىندە 30 نەمەرە مەن شوبەرە دە كورىپ وتىر. باتىر انانىڭ ءوزى دە 10 تۋىستى ۇلكەن وتباسىنان شىققان. ەگىز تابۋ وعان ءوز اناسىنان دارىعان. كوپ بالالى انا ۇرپاقتارىنىڭ باسى امان، باۋىرى بۇتىندىگىنە شۇكىرشىلىك ەتەدى.
تۇردىگوزەل اياعۇتوۆا، باتىر انا:
بالالارىمنىڭ قازىر قىزىعىن كورىپ وتىرمىن. جاقسىمىن، شۇكىرمىن. 30 نەمەرەم بار. بارلىق انالار دا باقىتتى بولسىن، بالالارىنا قۋانىپ ءجۇرسىن. قازاقستانىمىز جايناپ، گۇلدەنسىن. بەرەكەلى شاڭىراقتىڭ كەلىندەرى دە يبالى. ەنەسىنىڭ الدىنان كولدەنەڭ وتپەيدى. ءاربىر ءسوزىن ۇلاعات تۇتادى.
الماگۇل اياعۇتوۆا، كەلىنى:
ەنەمىز ءبارىن ۇيرەتىپ وتىرادى. ۇلكەن شاڭىراققا كەلىن بولۋ - قۋانىش، باقىت. باتىر انانى اۋىلدىڭ كۇللى تۇرعىنى قۇرمەت تۇتادى. جەرگىلىكتى بيلىك تە قولدان كەلگەن كومەگىن اياعان ەمەس، ۇنەمى وڭ قاباق تانىتىپ قامقورلىق جاساپ وتىرادى.
امان ارىستانوۆ، قىزىلتوبە اۋىلىنىڭ اكىمى:
بۇگىن، مىنە، كاسىپكەرلەردىڭ قولداۋىمەن وسى انامىزعا تەلەديدار، شاڭسورعىش الىپ كەلدىك. كوپ بالالى انالاردى ۇنەمى نازاردا ۇستاپ، ولارعا قول ۇشىن بەرۋگە دايىنبىز. تۇردىگوزەل اپا ماڭعىستاۋ وڭىرىندەگى «ەڭ كوپ بالالى انا» اتاندى. ونى ارنايى قۇرىلعان وبلىستىق كوميسسيا انىقتاپ وتىر.
«قازاقستان»
