قازاقستاندا زاڭسىز قارۋ ۇستاعان 189 ادام ۇستالدى

«قارۋ مەن وق-دارىلەردى زاڭسىز ساقتاعانى ءۇشىن جانە الىپ جۇرگەنى ءۇشىن 189 ادام ۇستالدى، 252 دانا اتىس قارۋى، 2315 ارنايى قۇرالدار مەن وق-دارىلەر تابىلدى جانە تاركىلەندى. مىسالى، الماتىدا «شاڭىراق-2» شاعىناۋدانىندا تۇرعىلىقتى جەرىنەن اڭشىلىق مىلتىق، 8 پنيەۆماتيكالىق مىلتىق، پنيەۆماتيكالىق تاپانشا، سنارياد، 12 گرانات، كالاشنيكوۆ اۆتوماتىنىڭ 2 ماگازينى، ساۋىت جانە قالقان تابىلىپ، تاركىلەنگەن ءتورت ازامات ۇستالدى. تاراز قالاسىندا ءبىر توپ ادام ۇستالدى، ولاردان 2 تراۆماتيكالىق جانە 1 سيگنالدىق تاپانشا، جارىق-شۋ گراناتاسى جانە 9 م م كاليبرلى 173 پاترون تابىلىپ، تاركىلەندى»، - دەدى ق ر ءى ءى م اكىمشىلىك پوليتسيا كوميتەتى باسقارماسىنىڭ باستىعى باعلانبەك ايتپايەۆ مينيسترلىكتە وتكەن بريفينگتە.

سونىمەن بىرگە، سپيكەردىڭ ايتۋىنشا، تالدىقورعاندا تۇرعىلىقتى جەرىنەن 9 پاترونى بار «ماكاروۆ» تاپانشاسى تابىلىپ، تاركىلەنگەن ادام ۇستالدى.

جامبىل وبلىسىندا تراۆماتيكالىق تاپانشا، اڭشىلىق مىلتىق جانە ساۋىت تاركىلەنگەن ەكى ادام ۇستالدى.

«تۇرعىنداردىڭ ءوز ەركىمەن 50 قارۋ، ونىڭ ىشىندە 5 - ءيىر ويىقتى، 29 - تەگىس ۇڭعىلى جانە وزگە دە 4 قارۋ تاپسىرىلدى»، - دەدى باسقارما باستىعى.

بۇعان دەيىن ق ر ىشكى ىستەر مينيسترلىگى 19- قاڭتاردا توتەنشە جاعداي رەجيمى جويىلعان سوڭ، ەلىمىزدىڭ بارلىق وڭىرلەرىندە «قۇقىقتىق ءتارتىپ» جەدەل-الدىن الۋ شاراسى وتەتىنىن جاريالاعان ەدى.

اتالعان شارا اياسىندا 4 مىڭنان استام قىلمىس اشىلدى.