تاۋەلسىزدىك العالى بەرى الماتى وبلىسىندا 188 ەلدى مەكەن جاڭا اتاۋعا يە بولعان
سونداي-اق، 75 اۋىلدىق وكرۋگ، 191 الەۋمەتتىك نىساننىڭ اتاۋى جاڭالانعان. بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە الماتى وبلىسىنىڭ تىلدەردى دامىتۋ جونىندەگى باسقارما باسشىسى احمەت كەندىربەك ۇلى مالىمدەدى.
ونىڭ ايتۋىنشا، ۇلى جەڭىستىڭ ماڭىزدىلىعى مەن وزەكتىلىگى دە ەسكەرىلىپ، 39 كوشەگە سوعىس ارداگەرلەرىنىڭ ەسىمدەرى بەرىلگەن.
وبلىستاعى تىلدىك احۋال، مەملەكەتتىك ءتىلدىڭ قىزمەت ەتۋ اياسىن كەڭەيتۋ مەن مارتەبەسىن نىعايتۋ ماقساتىندا اتقارىلىپ جاتقان ءىس- شارالارعا توقتالعان ا. كەندىربەك ۇلى مەملەكەتتىك تىلدەگى قۇجات اينالىمى تۋرالى دا تارقاتىپ ايتىپ بەردى. مىسالى، 2016 -جىلعى ءبىرىنشى جارتىجىلدىقتىڭ قورىتىندىسى بويىنشا كىرىس قۇجاتتارىنىڭ %82,3 ى، ال شىعىس قۇجاتتارىنىڭ %99,3 ى مەملەكەتتىك تىلدە كورىنىس تاپقان.
انا ءتىلىمىزدىڭ مارتەبەسى بەسىكتەن باستاۋ الاتىندىعىن ايتقان سپيكەر بالاباقشا، مەكتەپتەگى مەملەكەتتىك ءتىل ماسەلەسىنە دە توقتالىپ ءوتتى. وبلىستاعى 337 بالاباقشانىڭ %70,0 ى قازاق ءتىلدى. ال، 737 مەكتەپتىڭ 414 ى قازاق تىلىندە ءبىلىم بەرەدى. سونىڭ ىشىندە قازاق تىلىندە وقيتىن 330 مىڭنان استام وقۋشىنىڭ اراسىندا 8054 ى وزگە ەتنوس وكىلدەرى.