اقمولالىقتار ءبىرجان سالدىڭ 185 جىلدىق مەرەيتويىن دۇركىرەتىپ اتاپ ءوتتى
ءبىرجان سال اۋدانى اكىمدىگىنىڭ مالىمەتىنشە، ايتۋىلى شارا ستەپنياك قالاسىنداعى اۋداندىق مادەنيەت ۇيىندە ساندىك-قولدانبالى ونەر، تاريحي كورمە، ۇلتتىق قولونەر كورمەسىمەن باستالدى. «عاسىرلار اماناتى» تاريحي- ەتنوگرافيالىق كورمەسىندە اۋدان تۇرعىندارى مەن قوناقتارىنىڭ نازارىنا اقمولا وبلىستىق تاريحي-ولكەتانۋ مۋزەيىنىڭ قورىندا ساقتالعان قازاق حالقىنىڭ باعالى ارتەفاكتىلەرى مەن ماتەريالدىق جانە رۋحاني مادەنيەتىنىڭ جادىگەرلەرى ۇسىنىلدى. كورمەنى اقمولا وبلىسى مەن قازاقستان وڭىرلەرىنىڭ ونەر مايتالماندارى تاماشالادى.
كورمە ءبىرجان سال جانە ونىڭ زامانداستارى ءومىر سۇرگەن رۋحاني الەمگە جاناسۋعا جانە ۇلتتىق تۇرمىس زاتتارىنا جاڭا كوزقاراسپەن قاراپ، ولاردىڭ اراسىنداعى تەرەڭ ءوزارا بايلانىستى تۇسىنۋگە مۇمكىندىك بەردى.
بۇدان سوڭ شارا ءان ءدۇلدىلى ءبىرجان سالدىڭ ءومىر جولى مەن شىعارماشىلىعىنا ارنالعان عىلىمي-پراكتيكالىق كونفەرەنتسياسى ۇلاستى.
«اتاقتى اكادەميك احمەت جۇبانوۆ «بىرجان - قازاقتىڭ حالىقتىق مۋزىكا مادەنيەتىنىڭ الىبى. ونەر قايراتكەرى، ازامات بىرجاننىڭ اتى قازاق مۋزىكاسىنىڭ تاريحىندا التىنمەن جازىلادى» دەگەن سوزدەرى شىندىققا اينالىپ، مىنە بۇگىن ءبىز بارشامىز ۇلى بابامىزدىڭ 185 جىلدىق تورقالى تويىنا كۋا بولىپ وتىرمىز. ءوز داۋىرىندە سەگىز سەرى، نياز سەرىلەردىڭ ءىزىن جالعاپ، ارقانىڭ تۇنىعى شايقالماعان تۇما ونەرى ورنەگى بولەك ءداستۇرلى ءان مەكتەبىنىڭ سارا جولىن قالىپتاستىرعان ءبىرجان سال، قازاق مۋزىكاسىن جاڭا بيىككە كوتەردى»، - دەدى كونفەرەنسياعا قاتىسۋشىلار.
بۇل كۇنى مەرەيتويعا جينالعان حالىق وت اۋىزدى، وراق ءتىلدى شوجە، ءسۇيىنباي، قۇلتۋما، تاستانبەكتىڭ ساراسى سەكىلدى قارا ءسوزدىڭ قايماعىن قالقىپ العان اقىندار سالعان ءىزدى جالعاستىرىپ كەلە جاتقان، بۇگىندە ەسىمدەرى ەلگە تانىمال تالانتى ونەرى يەلەرى ديدار قاميەۆ، بوتاكوز مۇحيتدەنوۆا، الىبەك سەرعاليەۆ، اسەم جۇماعازينا، ماقسات اقانوۆ، ارزىگۇل قايىنبەك سىڭدى اقىنداردىڭ قاتىسۋىمەن وتكەن اقىندار ايتىسىن دا تاماشالادى.
سونىمەن قاتار، شارادا اۋدان اكىمى ەرمەك نۇعىمانوۆ ءوڭىردىڭ الەۋمەتتىك - ەكونوميكالىق دامۋىنا سۇبەلى ۇلەس قوسقان ءبىر توپ ازاماتتى ماراپاتتادى.
مەرەكەلىك شارا ش. قۇسايىنوۆ اتىنداعى قازاق مۋزىكالىق- دراما تەاترىنىڭ تەاترلاندىرىلعان قويىلىمى مەن قاجىباي جاقين، سايان مۇحامەدياروۆ، سارسەنباي حاسەنوۆ، ەرلان رىسقالي، داۋلەت مۇحتارحان، دانيار مۇحان، بۇگىندە قازاق ونەرىنە تىڭنان تۇرەن سالعان ونەرپاز نۇرسۇلتان قالالىق مەملەكەتتىك اكادەميالىق فيلورمونياسىنىڭ كامەرالىق حورىنىڭ كوركەمدىك جەتەكشىسى گۇلميرا قۇتتىباداموۆا سىندى ونەر مايتالماندارىنىڭ قاتىسۋىمەن وتكەن مەرەكەلىك كونسەرتكە جانە ۇلتتىق سپورت تۇرلەرى بويىنشا ۇيىمداستىرىلعان سايىسقا ۇلاستى.
