184 بالاعا «بولاشاق» ستيپەندياسى تاعايىندالدى
استانا. KAZINFORM - قازاقستان رەسپۋبليكاسىنىڭ مەملەكەتتىك كەڭەسشىسى ەرلان قاريننىڭ توراعالىعىمەن شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ كەزەكتى وتىرىسى ءوتتى، دەپ حابارلايدى اقوردانىڭ باسپا ءسوز قىزمەتى.
رەسپۋبليكالىق كوميسسيانىڭ شەشىمىمەن 184 وتانداسىمىزعا «بولاشاق» ستيپەندياسى تاعايىندالدى. ولار ماگيستراتۋرا جانە دوكتورانتۋرا باعىتتارى بويىنشا الەمنىڭ ۇزدىك ۋنيۆەرسيتەتتەرىندە ءبىلىم الادى.
سونىمەن قاتار كوميسسيا وتىرىسىندا وتاندىق عالىمداردىڭ جەتەكشى شەتەلدىك عىلىمي ورتالىقتاردا عىلىمي تاعىلىمدامادان ءوتۋ ماسەلەسى قارالدى. مەملەكەتتىك كەڭەسشى پرەزيدەنتتىڭ اتالعان باستاماسى قازاقستان عىلىمىنىڭ دامۋىن ىنتالاندىرۋعا باعىتتالعانىن اتاپ ءوتتى. ەرلان قارين عىلىمي تاعىلىمداماعا ارنالعان گرانتتاردى ءبولۋ كەزىندە وتاندىق عىلىمنىڭ باسىم باعىتتارى بويىنشا تەپە-تەڭدىكتى مىندەتتى تۇردە ساقتاۋ قاجەت ەكەنىنە نازار اۋداردى. بۇل الەۋمەتتىك-گۋمانيتارلىق، سونداي اق ينجەنەرلىك-تەحنيكالىق ماماندىقتارعا دا قاتىستى.
مەملەكەتتىك كەڭەسشى ەرلان قارين وتىرىس قورىتىندىسى بويىنشا «بولاشاق» حالىقارالىق ستيپەندياسىنا جانە عىلىمي تاعىلىمدامالار باعدارلاماسىنا كونكۋرستىق نەگىزدە ىرىكتەۋ پروتسەسىن ودان ءارى جۇزەگە اسىرۋعا ءارى جەتىلدىرۋگە قاتىستى ءبىرقاتار ناقتى تاپسىرما بەردى.
