وتكەن جىلدان بەرى 182 قازاقستاندىق پارا بەرگەنى ءۇشىن سوتتالدى

استانا. قازاقپارات - 2013 - جىلى جانە 2014 - جىلدىڭ 9 ايىندا ق ر ق ك 312-بابى بويىنشا (پارا بەرۋ) 182 ادام سوتتالدى، ونىڭ 86 سى باس بوستاندىعىنان ايىرىلدى. Tengrinews.kz تىلشىسىنە مۇنداي مالىمەتتەردى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى ۇسىندى.

باس بوستاندىعىنان ايىرۋ جازاسىن العانداردىڭ باسىم كوپشىلىگى 8 دەن 12  جىلعا دەيىن سوتتالعاندار (29 ادام)، 5 تەن 8  جىلعا دەيىن 27 ادام سوتتالعان، 3 تەن 5  جىلعا دەيىن 14 ادام، 1 دەن 3  جىلعا دەيىن 12 ادام سوتتالعان، 4 ادامعا 1  جىلعا دەيىن باس بوستاندىعىنان ايىرۋ جازاسى بەرىلگەن.

جەمقورلىققا قارسى قىزمەت ماماندارى قولدانىستاعى قىلمىستىق زاڭنامادا مەملەكەتتىك قىزمەتكەرلەر مەن ولارعا تەڭەستىرىلگەندەرگە پارا بەرۋ ءۇشىن جاۋاپكەرشىلىك قاراستىرىلعانىن ەسكە سالادى. قازاقستان رەسپۋبليكاسى قىلمىستىق كودەكسىنىڭ 312-بابى سانكتسيانىڭ بىرنەشە ءتۇرىن بەلگىلەيدى، اتاپ ايتقاندا، 700 دەن 3000 ا ە ك-كە دەيىن ايىپپۇل سالۋ نەمەسە بەس جىلعا دەيىن بوستاندىعىن شەكتەۋ نەمەسە مۇلكىن تاركىلەۋمەن بىرگە 15  جىلعا دەيىن باس بوستاندىعىنان ايىرۋ.

بۇعان دەيىن وسى جىلدىڭ تامىز ايىندا "نۇر وتان" پارتياسىنىڭ قوعامدىق ساياسات ينستيتۋتىنىڭ قازاقستاننىڭ بۇكىل ايماعىندا جۇرگىزگەن ساۋالناماسىنىڭ ناتيجەلەرى جاريالانعان ەدى. "سوڭعى ءبىر جىل ىشىندە ءسىز پارا بەرگەنىڭىزگە نەمەسە العانىڭىزعا قاراماستان، جەمقورلىققا قاتىستى احۋالدى باستان وتكەردىڭىز بە؟" دەگەن ساۋالعا رەسپوندەنتتەردىڭ 32,7 پايىزى ماقۇلداپ جاۋاپ بەردى، ولاردىڭ 71 پايىزى مۇنداي جاعدايلاردا پارا بەرگەن.

ساۋالناماعا قاراعاندا، كوپشىلىك پارا بەرۋگە سەبەپ بولعان جايت رەتىندە بىرەۋدىڭ ىقىلاسىنا بولەنۋ نەمەسە لاۋازىمدى تۇلعا تاراپىنان اناعۇرلىم ساپالى جۇمىسقا قول جەتكىزۋ نيەتىن (36,6 پايىز)، ماسەلەنى زاڭدى جولمەن شەشۋگە ۋاقىتى مەن مۇمكىندىگىنىڭ جوقتىعىن (25,7 پايىز) اتاعان.

"مۇنداي ادەت قازاقستاندىقتاردىڭ قۇقىقتىق ساۋاتسىزدىعىنا جانە ولاردىڭ ازاماتتىق مادەنيەتىنىڭ تومەندىگىنە بايلانىستى"، - دەپ ەسەپتەيدى "نۇر وتان" وكىلدەرى.

ساۋالناماعا 1600 ادام قاتىستى.