ۆەدومستۆوارالىق تەرگەۋ: جاپپاي تارتىپسىزدىك جانە لاڭكەستىك اكتىلەرى بويىنشا 181 قىلمىستىق ءىس بار
بۇل تۋرالى ورتالىق كوممۋنيكاتسيالار قىزمەتىندە ق ر باس پروكۋراتۋراسى 1-قىزمەت باستىعىنىڭ ورىنباسارى ەلدوس قيلىمجانوۆ ايتتى، دەپ حابارلايدى قازاقپارات ءتىلشىسى.
«باس پركۋراتۋرا قاڭتار وقيعالارى كەزەڭىندە جاسالعان قىلمىستاردىڭ تەرگەلۋىن جانە ازاماتتاردىڭ كونستيتۋتسيالىق قۇقىقتارىن قورعاۋ جۇمىستارىن جالعاستىرۋدا. بارلىعى 3096 سوتقا دەيىنگى تەرگەپ-تەكسەرۋلەر تىركەلدى. نەگىزىندە ولار مەنشىككە قارسى، بۇزاقىلىق جانە قارۋدى جىمقىرۋ قىلمىستارى. ارنايى پروكۋرورلاردىڭ باسقارۋىمەن ۆەدومستۆوارالىق تەرگەۋ توبى جاپپاي تارتىپسىزدىك جانە لاڭكەستىك اكتىلەرى بويىنشا 181 قىلمىستىق ءىستى تەرگەپ جاتىر»، - دەدى ە. قيلىمجانوۆ.
ونىڭ ايتۋىنشا، قىلمىستىق كودەكس بويىنشا جاپپاي تارتىپسىزدىكتەر ازاماتتارعا كۇش قولدانۋمەن، بيزنەس نىساندارىن جانە جەكە مۇلىكتى قيراتۋمەن، بيلىك وكىلىنە قارۋلى قارسىلىق كورسەتۋگە ۇلاسادى.
«الايدا جەكەلەگەن ادامداردىڭ ارەكەتى حالىق اراسىندا ۇرەي مەن قوقىنىشتى تۋعىزۋدى جانە مەملەكەتتىك ورگانداردىڭ قىزمەتىن توقتاتۋدى ماقسات ەتتى. سول ءۇشىن ولار مەملەكەتتىك بيلىكتىڭ سيمۆولى رەتىندە اكىمدىك عيماراتتارىنا، سونداي-اق ءتارتىپ كۇشتەرى نىساندارىنا شابۋىل جاساپ، وعان توسقاۋىل قويدى. سوندىقتان وسىنداي ءىس-ارەكەتتەر قىلمىستىق كودەكستىڭ 255-بابىنا سايكەس، تەرروريزم اكتىلەرى رەتىندە سارالانادى»، - دەدى ەلدوس قيلىمجانوۆ.
قۇقىق قورعاۋ ورگاندارىنىڭ عيماراتىن باسىپ الۋدىڭ نەگىزگى ماقساتى - اتىس قارۋىن يەمدەنۋ.
اتاپ ايتقاندا، الماتى وبلىسىندا پوليتسيا دەپارتامەنتى عيماراتىنان 53 اۆتومات، 367 تاپانشا، 1 گراناتامەت، سونداي-اق 23 مىڭنان استام پاترون ۇرلانعان، - دەدى ول.
