پاۆلودارعا قىتاي، رەسەي، موڭعوليا، وزبەكستان جانە قىرعىزستاننان 181 وتباسى كوشىپ كەلگەن
اتاجۇرتقا ورالعان قانداستارىمىزدىڭ 200 دەن استامى وزبەكستان رەسپۋبليكاسىنان كەلسە، 166 ادام موڭعوليادان قونىس اۋدارعان. ونىڭ ىشىندە 83 ى - قىتايدان، 20 سى - رەسەيدەن جانە بىرەۋى قىرعىز ەلىنەن، دەپ حابارلايدى pavlodarnews.kz.
ورالمانداردىڭ 76 پايىزى پاۆلودار، اقسۋ جانە ەكىباستۇز قالالارىنا ورنالاسسا، قالعانى باسقا اۋداندار مەن اۋىلدارعا قونىس تەپكەن. وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنا قاراستى كوشى- قون ءبولىمىنىڭ باس مامانى مۇحيت جاقسىلىق ۇلىنىڭ سوزىنشە، بيىل جىل باسىندا ق ر كوشى- قون زاڭىنا قايتا وزگەرىستەر مەن تولىقتىرۋلار ەنگىزىلىپ، شەتەلدەن كەلگەن قانداستارعا كوشىپ كەلۋ جول شىعىنىن تولەۋ ماسەلەسى شەشىمىن تاپقان.
سونىڭ ناتيجەسىندە جىل باسىنان بەرى «جۇمىسپەن قامتۋدىڭ جول كارتاسى - 2020» مەملەكەتتىك باعدارلاماسى اياسىندا 190 وتباسىنا، ياعني، 700 دەي ادامعا جول شىعىنىن وتەۋ سۋبسيدياسى بەرىلگەن. ۇكىمەت بەكىتكەن سۋبسيديا مولشەرى بويىنشا وتباسىنداعى ءبىر ادامعا 100 مىڭ تەڭگە بەرىلسە، باسقا مۇشەلەرىنە 75 مىڭ تەڭگەدەن ۇلەستىرىلدى.
ولاردىڭ تەڭ جارتىسىنان استامىن 2013 -جىلدان بەرى كوشىپ كەلگەن ازاماتتار قۇرايدى. "2016 -جىلى 690 وتباسىنا وسىنداي سۋبسيديا بەرىلەدى دەپ جوسپارلانعان بولاتىن. ءبىراق بۇل كورسەتكىشتى ورىنداي المادىق. وسى ساناتقا كىرەتىن ازاماتتاردىڭ قۇجاتتارىن ءالى دە قابىلداپ جاتىرمىز. جىل سوڭىنا دەيىن تاعى 200 وتباسىنىڭ كوشىپ كەلۋگە جۇمساعان جول شىعىنىن وتەپ بەرۋىمىز مۇمكىن. ال، كەلەر جىلى 100 وتباسىن قابىلداۋدى جوسپارلاپ وتىرمىز»، - دەيدى مۇحيت جاقسىلىق ۇلى.
