بىشكەك شوقان ءۋاليحانوۆتىڭ 180 جىلدىق مەرەيتويىن اتاپ وتپەك
بۇل تۋرالى حالىقارالىق تۇركى اكادەمياسىنىڭ باسپا ءسوز قىزمەتى حابارلادى.
حالىقارالىق تۇركى اكادەمياسىنىڭ قىرعىز رەسپۋبليكاسى مادەنيەت، اقپارات جانە تۋريزم مينيسترلىگىنىڭ قولداۋىمەن وتكىزگەلى وتىرعان مەرەيتويلىق شاراسى اياسىندا قىرعىزدىڭ بەلگىلى مەملەكەت قايراتكەرى، شوقانعا قاشقاريا ساپارى كەزىندە قولداۋ كورسەتكەن بورومباي ءبيدىڭ 235 جىلدىق مەرەيتويى قاتار اتالىپ وتپەك.
شوقان مەن بورامباي ءبي العاش رەت 1856-جىلى كەزدەسىپ، عالىم ءبيدىڭ سۋرەتىن سالعان. بورامباي ءبي سول كەزدەسۋدە شوقانعا «ماناس» جىرىنىڭ ۇزىندىلەرىن ايتىپ، ناتيجەسىندە «كوكەتايدىڭ اسى» اتتى ءبولىمنىڭ جاريالانۋىنا سەبەپكەر بولعانى جونىندە دەرەكتەر بار.
وسىعان وراي، بىشكەكتەگى ا. مالدىبايەۆ اتىنداعى قىرعىز ۇلتتىق اكادەميالىق وپەرا جانە بالەت تەاترىندا تالانتتى تاريحشى، فولكلورشى، گەوگراف، ەتنوگراف شوقان شىڭعىس ۇلىنىڭ مول مۇراسىنا ارنالعان كورمە ۇيىمداستىرىلىپ، قوس ەلدىڭ مەملەكەت جانە قوعام قايراتكەرلەرى مەن كورنەكتى عالىمدارى قاتىساتىن سالتاناتتى جيىن وتكىزىلمەك. سونىمەن قاتار، قازاق-قىرعىز ونەرپازدارى كورەرمەندەرگە مادەني باعدارلاما ازىرلەۋدە.
Baq.kz
