قازاقستاندا 1800 دەن استام لاۋازىم يەلەرى جەمقورلىققا جول بەرگەنى ءۇشىن جازالاندى
بۇل تۋرالى بۇگىن استانادا ە ى د ۇ سىبايلاس جەمقورلىققا قارسى جەلىسى قۇقىق قورعاۋ ورگاندارىنىڭ جەتىنشى وتىرىسىندا ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگى ءتوراعاسىنىڭ ورىنباسارى اليك شپەكبايەۆ ءمالىم ەتتى، دەپ حابارلايدى قازاقپارات.
«2015-2016 -جىلدارى ءبىزدىڭ جەمقورلىققا قارسى قىزمەتتىڭ، ۇلتتىق بيۋرو جۇمىسىنىڭ ناتيجەسى بويىنشا، 1800-دەن استام لاۋازىمدى تۇلعالار سىبايلاس جەمقورلىق ءۇشىن جازاعا تارتىلدى. ولاردىڭ ىشىندە رەسپۋبليكالىق ماڭىزداعى ءتۇرلى دەڭگەيدەگى باسشىلار 21-دەن استام، وبلىستىق -120، قالالىق جانە اۋداندىق- 313. 48 ميلليارد تەڭگەدەن استام كەلتىرىلگەن زالال انىقتالدى، سونىڭ ىشىندە ورنى تولتىرىلعان جانە تىيىم سالىنعان مۇلىك قۇنى 32 ميلليارد تەڭگەدەن اسادى»، - دەپ توقتالدى شپەكبايەۆ.
ونىڭ سوزىنە قاراعاندا، ءاربىر تەرگەلگەن قىلمىستىق ءىس بويىنشا وتاندىق قىلمىستىق- پروتسەسسۋالدىق كودەكسكە سايكەس نۇسقاما ەنگىزىلەدى. وسى رەتتە 1528 وسىنداي نۇسقاما جىبەرىلىپ، 436 تارتىپتىك جازا ەنگىزىلدى.
«بۇل باعىتتاعى جۇمىستار بويىنشا ءتيىستى ناتيجەلەر ايقىندالدى، ياعني قىزمەتىن تومەندەتۋمەن مەملەكەتتىك قىزمەتتى ورىنداۋدان بوساتىلعاندار بار، سونىمەن قاتار جۇمىسىنان شىعارىلعاندار دا جەتكىلىكتى»، - دەدى ول
اۆتور: رۋسلان عابباسوۆ
