ەلىمىز ءۇش ايدا 18,7 ميلليارد دوللاردىڭ تاۋارىن ەكسپورتقا شىعاردى
«الدىن الا قورىتىندى بويىنشا 2023 -جىلعى قاڭتار- ناۋرىزدا سىرتقى ساۋدا تاۋار اينالىمى 13,4 پايىزعا ءوسىپ، 32,7 ميلليارد دوللاردى قۇرادى. ەكسپورت 18,7 ميلليارد دوللار بولدى. بۇل رەتتە وڭدەلگەن تاۋارلار ەكسپورتى 8,1 پايىزعا ۇلعايىپ، 5,9 ميلليارد دوللارعا جەتتى. تاۋارلار يمپورتى 14 ميلليارد دوللاردى قۇرادى. جالپى، وڭ ساۋدا بالانسى 4,8 ميلليارد دوللارعا تەڭ»، - دەدى ۇلتتىق ەكونوميكا ءمينيسترى.
وسى جىلدىڭ 4 ايىندا ەلىمىزدىڭ 16 وڭىرىندە وڭدەۋ ونەركاسىبى ءوستى.
«وڭدەۋ ونەركاسىبىندە وڭ ءوسىم ساقتالىپ وتىر. ءوندىرىس كولەمى 5,1 پايىزعا ءوستى. كورسەتكىش ءوسىمى 16 وڭىردە تىركەلدى. سونىڭ ىشىندە ەڭ جوعارعى ءوسىمدى قوستاناي، سولتۇستىك قازاقستان، اباي وبلىستارى جانە الماتى قالاسى كورسەتتى. وڭدەۋ ونەركاسىبى سالالارى بويىنشا ماشينا جاساۋ ءوندىرىسىنىڭ - 35,9، ونىڭ ىشىندە اۆتوموبيل جاساۋدىڭ - 41,2، ەلەكتر جابدىقتارىن جاساۋدىڭ 45,6 پايىزعا ءوسۋى قامتاماسىز ەتىلدى. سونداي- اق ءوسىم كەلەسى سالالاردا بايقالىپ وتىر: ازىق- تۇلىك ءوندىرىسى - 7,7، مۇناي وڭدەۋ ونىمدەرى - 2,8، حيميا ونەركاسىبى - 0,5، سۋسىندار ءوندىرىسى - 6,9، فارماتسيەۆتيكا ءوندىرىسى - 3,6، جەڭىل ونەركاسىپ - 34,9»، - دەدى الىبەك قۋانتىروۆ.
ونىڭ دەرەگىنشە، تاۋ- كەن ونەركاسىبىندەگى ءوندىرىس كولەمى 2 پايىزعا جوعارىلادى.
«بۇل رەتتە گاز ءوندىرۋ - 4,4، مۇناي ءوندىرۋ - 3,2، وزگە دە پايدالى قازبالاردى ءوندىرۋ 20,6 پايىزعا ءوستى. مەتالل كەندەرىن ءوندىرۋ - 0,8، تاۋ- كەن ونەركاسىبىندە قىزمەت كورسەتۋ - 1,9، كومىر ءوندىرۋ 9,9 پايىزعا تومەندەدى»، - دەدى مينيستر.
«ەكونوميكالىق ءوسىمدى قامتاماسىز ەتۋ ماقساتىندا ورتالىق جانە جەرگىلىكتى اتقارۋشى ورگاندارعا كەلەسى ءىس- شارالارعا نازار اۋدارۋ ۇسىنىلادى. بىرىنشىدەن، ينفلياتسياعا قارسى دەن قويۋ ءىس- شارالارىن ءتيىستى دەڭگەيدە ىسكە اسىرۋ جانە وتاندىق ازىق- تۇلىك تاۋارلارىن وندىرۋشىلەرگە قولداۋ شارالارىن كورسەتۋ قاجەت. ەكىنشىدەن، سالىنىپ جاتقان نىسانداردى ۋاقىتىلى پايدالانۋعا بەرۋ بويىنشا باقىلاۋدى قامتاماسىز ەتە وتىرىپ، قۇرىلىس جۇمىستارى ماۋسىمىن ءتيىمدى جۇرگىزۋ كەرەك»، - دەدى مينيستر.
ونىڭ ايتۋىنشا، ۇشىنشىدەن، ينۆەستورلاردى تارتۋ جانە سۇيەمەلدەۋ بويىنشا ناقتى جۇمىستى بارلىق دەڭگەيلەردە جانداندىرۋ قاجەت.
تورتىنشىدەن، ەكسپورتتاۋشىلاردىڭ جاڭا نارىقتارعا شىعۋىن قولداۋ، ەكسپورتتاۋ باعىتتارىنىڭ بالامالى جولدارىن قالىپتاستىرۋ كەرەك.
«بەسىنشىدەن، بيزنەس وكىلدەرىن كەشەندى قولداۋ جانە ولار ءۇشىن قولايلى جاعداي جاساۋدى قامتاماسىز ەتۋ قاجەت»، - دەدى الىبەك قۋانتىروۆ.
