وتكەن جىلى جىلى 18 رەسپۋبليكالىق، 59 وبلىستىق دەڭگەيدەگى باسشى قىلمىستىق جاۋاپكەرشىلىككە تارتىلدى
وندا ق ر سىبايلاس جەمقورلىققا قارسى ستراتەگياسىن ىسكە اسىرۋ جونىندەگى 2015-2017 -جىلدارعا ارنالعان ءىس- شارالار جوسپارىنىڭ جانە «سىبايلاس جەمقورلىققا قارسى ءىس- قيمىل تۋرالى» زاڭنىڭ ورىندالۋ بارىسى قارالدى، دەپ حابارلايدى قازاقپارات.
جيىندى اشقان گۇلشارا ءابدىقالىقوۆا مەملەكەت باسشىسىنىڭ تاپسىرماسى اياسىندا سىبايلاس جەمقورلىققا قارسى ستراتەگيا مەن «سىبايلاس جەمقورلىققا قارسى ءىس- قيمىل تۋرالى» زاڭنىڭ نەگىزىنە جەمقورلىق ارەكەتتەردىڭ الدىن الۋعا باسا ءمان بەرىلگەندىگىن اتاپ ءوتتى.
«جۇمىستىڭ نەگىزگى باعىتى مەملەكەتتىك قىزمەت سالاسىندا، كۆازيمەملەكەتتىك جانە جەكەمەنشىك سەكتوردا، سوت پەن قۇقىق قورعاۋ ورگاندارىندا جەمقورلىققا قارسى تۇرۋ، قوعامدىق باقىلاۋ ينستيتۋتىن ەنگىزۋ، سىبايلاس جەمقورلىققا قارسى مادەنيەت دەڭگەيىن قالىپتاستىرۋ جانە حالىقارالىق ىنتىماقتاستىقتى دامىتۋ بولىپ وتىر»، - دەدى مەملەكەت باسشىسى.
وتىرىس بارىسىندا ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگى ءتوراعاسىنىڭ ورىنباسارى ا. شپەكبايەۆتىڭ بايانداماسى تىڭدالدى. ونىڭ ايتۋىنشا، سىبايلاس جەمقورلىققا قارسى ستراتەگيادا جوسپارلانعان 64 شارانىڭ 95 پايىزى ىسكە استى، قالعانى وسى جىلى اياقتالادى. وتكەن جىلى وكىلەتتى ورگانمەن 156 مەملەكەتتىك ورگاننىڭ قىزمەتىندەگى سىبايلاس جەمقورلىق ارەكەتتەرىنە تالداۋ جاسالدى. 2 مىڭنان اسا جەمقورلىق قۇقىق بۇزۋشىلىق جاساۋعا ىقپال ەتكەن ءمان- جايلاردى جويۋ جونىندە ۇسىنىم حات ەنگىزىلدى. جەمقورلىققا قارسى تۇرۋدا جازانىڭ بۇلتارتپاستىعى مەن زاڭ ۇستەمدىگىنىڭ قاعيدالارى قامتاماسىز ەتىلدى. ماسەلەن، 2016 -جىلى 18 رەسپۋبليكالىق ماڭىزى بار، 59 وبلىستىق، 134 قالالىق جانە اۋداندىق دەڭگەيدەگى باسشى قىلمىستىق جاۋاپكەرشىلىككە تارتىلدى. انىقتالعان 13,6 ميلليارد تەڭگە كولەمىندەگى زالالدىڭ 5,3 ميلليارد تەڭگە نەمەسە 39 پايىزى وتەلدى.
جيىن سوڭىندا مەملەكەتتىك حاتشى سىبايلاس جەمقورلىققا قارسى ستراتەگيانى ىسكە اسىرۋ بويىنشا كەزەكتى جوسپار ازىرلەۋ جونىندە تاپسىرما بەردى.
ايتا كەتەيىك، رەسپۋبليكالىق كوميسسيانىڭ سەلەكتورلىق رەجىمدەگى وتىرىسقا بەينەبايلانىس ارقىلى استانا، الماتى قالالارىنىڭ جانە وبلىستاردىڭ اكىمدەرى، سىبايلاس جەمقورلىققا قارسى ءىس- قيمىل جونىندەگى وڭىرلىك كوميسسيالاردىڭ مۇشەلەرى قاتىستى.
اۆتور: مارلان جيەمباي
