ءۇندىستانداعى مۇز كوشكىنى: 18 ادامنىڭ دەنەسى تابىلدى، 200 تۇرعىن ءىز- ءتۇزسىز كەتتى

نۇر- سۇلتان. قازاقپارات - مۇز كوشكىنى ءجۇرىپ، سالدارىنان سۋ تاسقىنى بولعان ءۇندىستاندا قۇرباندار سانى ارتىپ جاتىر.

جەرگىلىكتى ب ا ق حابارلاۋىنشا، قازىرگى ۋاقىتتا 18 ادامنىڭ ءمايىتى تابىلدى، 200 دەن اسا تۇرعىن ءىز- ءتۇزسىز جوعالىپ كەتكەن، دەپ حابارلايدى قازاقپارات Euronews اگەنتتىگىنە سىلتەمە جاساپ.

وقيعا ورنىندا قۇتقارۋشىلار جۇمىس ىستەپ جاتىر. ولار سوعىلىپ جاتقان تۋننەلگە كىرەتىن جەردى تازالاپ، 12 ادامدى قۇتقارىپ الدى. بولجام بويىنشا، تاعى ءبىر تۋننەلدە 30 ادام بار. ءبىراق ولار ازىرگە قۇتقارىلعان جوق. مۇزدى كوشكىن گانگا ساعاسىنىڭ بويىنداعى اڭعارلاردىڭ بىرىندە جەكسەنبى كۇنى تاڭەرتەڭ باستالدى. كوشكىن بوگەتتى شايىپ كەتتى. سوعىلىپ جاتقان ەكى سۋ ەلەكتر ستانساسى مەن جۇمىسشىلار كەنتى قيرادى. ۋاقىتىندا قولدانىلعان شارالار بۇدان دا كۇردەلى اپاتتىڭ الدىن الدى.

ەسكە سالا كەتسەك، بۇدان بۇرىن ءۇندىستاننىڭ تاۋلى ايماعىنداعى ۋتتاراكحاند شتاتىندا قار كوشكىنى سالدارىنان وزەن سۋى تاسىپ، تابيعات اپاتىنان 150 گە جۋىق ادامنىڭ قازا تاپقانىن حابارلاعان بولاتىنبىز. كەيىنىرەك ءۇندىستان پرەمەر- ءمينيسترى نارەندرا مودي ۋتتاراكحاند شتاتىنداعى مۇز كوشكىنى سالدارىنان تۋىنداعان سۋ تاسقىنىنىڭ باقىلاۋعا الىنعانىن مالىمدەدى.