ناۋرىزدا جىلدىق ينفلياتسيا 18,1 پايىزعا دەيىن تومەندەدى
«ۇلتتىق بانكتىڭ بولجاعان تراەكتورياسىنا سايكەس، ناۋرىزدا جىلدىق ينفلياتسيا 18,1 پايىزعا دەيىن تومەندەدى. بۇل باسقالارمەن قاتار وتكەن جىلعى جوعارى بازانىڭ ەسەپتەن شىعۋىنان بولدى. ينفلياتسيانىڭ بارلىق كومپونەنتى بويىنشا دا باياۋلاۋ بايقالادى. سونىمەن قاتار، وڭتۇستىك وڭىرلەردەگى ءونىمنىڭ شىعىنعا ۇشىراۋى مەن ۇسىك سالدارىنان جەمىس-جيدەك پەن كوكونىس باعاسىنىڭ كوتەرىلۋى، سونداي-اق سۇرانىستىڭ جوعارى بولۋىنان كولىك قىزمەتى قۇنىنىڭ ءوسۋى ينفلياتسيانىڭ تومەندەۋىن تەجەدى. بيىلعى ناۋرىزدا ازىق-تۇلىك ينفلياتسياسى ايتارلىقتاي باياۋلاپ، 20,5 پايىزدى قۇراعانىمەن، جالپى ينفلياتسياعا كوپتەپ ۇلەس قوسۋىن جالعاستىرىپ كەلەدى. ازىق-تۇلىككە جاتپايتىن تاۋارلار باعاسىنىڭ ءوسىمى - 18,1 پايىزعا دەيىن، قىزمەتتەر باعاسىنىڭ ءوسىمى - 14,4 پايىزعا دەيىن باياۋلادى»، - دەدى ول.
ونىڭ اتاپ وتۋىنشە، اقپان ايىنداعى ايلىق ينفلياتسيانىڭ ءبىرشاما جەدەلدەۋى باعالاردىڭ تومەندەۋ ترەندىن بۇزعان بولاتىن.
الايدا، كەيىن ايلىق ينفلياتسيا 0,9 پايىزعا دەيىن باياۋلادى. بازالىق ينفلياتسيانىڭ ءارتۇرلى باعالاۋلارى دا باسەڭدەپ كەلەدى.
ءبىراق ولار ءالى دە جوعارى پروينفلياتسيالىق ورتانىڭ ساقتالۋىن كورسەتىپ وتىر.
ماسەلەن، جەمىس-جيدەك پەن كوكونىس ونىمدەرىنە، رەتتەلەتىن قىزمەتتەر مەن قۋات كوزدەرىنە باعا ءوسىمىنىڭ اسەرىن ەسكەرمەيتىن ماۋسىمدىق فاكتورلاردان تازارتىلعان جىلدىق بازالىق ينفلياتسيا 19,9 پايىزدى قۇرادى.
دەگەنمەن، ول تاريحي ورتاشا كورسەتكىشتەن جوعارى قالىپتاسۋىن جالعاستىرىپ كەلەدى.
«ينفلياتسيالىق كۇتۋلەر قاڭتار-اقپان ايلارىندا تومەندەگەننەن كەيىن قايتا قارقىن الدى. كۇتىلەتىن ينفلياتسيانىڭ مەديانالىق كورسەتكىشى 16,5 پايىز بولدى. ساۋالناما دەرەكتەرى بويىنشا، ينفلياتسيانىڭ نەگىزگى فاكتورلارى - ازىق-تۇلىك پەن وتىن باعاسىنىڭ ءوسۋى، سىرتقى جاعداي، تەڭگەنىڭ ايىرباستاۋ باعامىنىڭ ديناميكاسى جانە جالاقى مەن زەينەتاقىنىڭ ءوسۋى. جوعارى جانە قۇبىلمالى ينفلياتسيالىق كۇتۋلەر دە - ينفلياتسيانىڭ تومەندەۋىن تەجەيتىن نەگىزگى فاكتورلاردىڭ ءبىرى»، - دەدى عالىمجان ءپىرماتوۆ.
