بيىل 17 مىڭعا جۋىق بوزبالا اسكەرگە الىنادى
نۇر- سۇلتان قالاسىندا قورعانىس ءمينيسترىنىڭ ءبىرىنشى ورىنباسارى - قارۋلى كۇشتەر باس شتابىنىڭ باستىعى گەنەرال- لەيتەنانت مارات قۇسايىنوۆتىڭ باسشىلىعىمەن ازاماتتاردى 2021 -جىلى مەرزىمدى اسكەري قىزمەتكە شاقىرۋدىڭ قورىتىندىسى شىعارىلدى. اتالعان كەڭەسكە قاۋىپسىزدىك كەڭەسىنىڭ، باس پروكۋراتۋرانىڭ، كۇشتىك قۇرىلىمداردىڭ، ورتالىق مەملەكەتتىك ورگانداردىڭ وكىلدەرى، اكىمدەردىڭ ورىنباسارلارى، دەنساۋلىق ساقتاۋ باسقارمالارىنىڭ باسشىلارى، وبلىستاردىڭ جانە رەسپۋبليكالىق ماڭىزى بار قالالاردىڭ قورعانىس ىستەرى جونىندەگى دەپارتامەنتتەرىنىڭ باستىقتارى قاتىستى.
- اسكەري قىزمەت - ەل ەگەمەندىگىن ساقتاۋدىڭ نەگىزى. وسىعان بايلانىستى، جاستاردى تاربيەلەۋ جانە ولاردى وتانىن قورعاۋعا دايىنداۋ مەملەكەت پەن قوعامنىڭ ماڭىزدى مىندەتى بولماق، - دەپ اتاپ ءوتتى گەنەرال- لەيتەنانت مارات قۇسايىنوۆ.
2021 -جىلى قارۋلى كۇشتەردىڭ، باسقا دا اسكەرلەر مەن اسكەري قۇرالىمداردىڭ قاتارىنا 32 مىڭنان استام ازامات شاقىرىلدى. بۇل كۇشتىك قۇرىلىمداردىڭ بولىمشەلەرىن مەرزىمدى قىزمەتتەگى اسكەري قىزمەتشىلەردىڭ قاجەتتى سانىمەن جاساقتاۋعا مۇمكىندىك بەردى. اسكەرگە شاقىرىلۋشىلار شاقىرۋ پۋنكتەرىندە جانە اسكەري بولىمدەرگە كەلگەننەن كەيىن دەنساۋلىق قاۋىپسىزدىگىن قامتاماسىز ەتۋ ماقساتىندا COVID-19-عا پ ت ر- زەرتتەۋلەر جۇرگىزدى.
اسكەرگە شاقىرىلۋشىلار SMS- حابارلامالار ارقىلى مالىمدەندى. بۇگىندە اسكەرگە شاقىرۋ جاسىنداعى جاستار گادجەتتەرگە شامادان تىس قۇمارلىققا، تەڭگەرىمسىز تاماقتانۋعا بايلانىستى جانە قوزعالىستىڭ ازدىعىنان ءبىرقاتار اۋرۋلاردان زارداپ شەگەدى دەلىنگەن مەديتسينالىق كوميسسيا كەلتىرگەن مالىمەتتەردە. العاشقى مەديتسينالىق كۋالاندىرۋدان كەيىن ولار قوسىمشا تەكسەرۋگە جىبەرىلەدى. سونىمەن قاتار، قازىرگى ۋاقىتتا كانديداتتاردى كۋالاندىرۋ جۇمىسىنىڭ ساپاسىن ارتتىرۋ ماقساتىندا دەنساۋلىق ساقتاۋ مينيسترلىگىنىڭ اقپاراتتىق جۇيەلەرىنە قول جەتكىزۋ ماسەلەسى شەشىلۋدە. قازاقستان پرەزيدەنتى قاسىم- جومارت توقايەۆتىڭ جاستاردىڭ مەرزىمدى اسكەري قىزمەت اتقارۋعا ىنتاسىن ارتتىرۋ جونىندەگى تاپسىرماسىن ىسكە اسىرۋ شەڭبەرىندە قورعانىس مينيسترلىگى ءبىرقاتار ۇسىنىستار ازىرلەدى.
ولار اسكەرگە شاقىرىلۋشىلار مەن ولاردىڭ وتباسى مۇشەلەرىن الەۋمەتتىك قولداۋعا قاتىستى بولىپ وتىر. قورعانىس ۆەدومستۆوسى ازاماتتاردىڭ مەرزىمدى اسكەري قىزمەت وتكەرۋ كەزەڭىندە ولارعا كرەديتتەر مەرزىمىن ۇزارتىپ بەرۋدى، ءبىلىم بەرۋ سەكتورىندا جەڭىلدىكتەر قاراستىرۋدى، سونداي- اق ولاردىڭ وتباسى مۇشەلەرىنە كوممۋنالدىق قىزمەتتەرگە اقى تولەۋ كەزىندە جەڭىلدىكتەر بەرۋدى ۇسىندى.
باس شتاب باستىعى اسكەرلەردى جاس ساربازدارمەن ۋاقىتىلى جانە ساپالى جاساقتاۋعا، اسكەرگە شاقىرۋ جانە مەديتسينالىق كوميسسيالار جۇمىسىنىڭ ساپاسىن جاقسارتۋعا، سونداي- اق ورىن العان پروبلەمالىق ماسەلەلەردى شەشۋدە بىرلەسىپ شارالار قابىلداۋعا نازار اۋداردى. ودان وزگە، الداعى كوكتەمگى اسكەرگە شاقىرۋ مىندەتتەرى دە بەلگىلەندى.
بيىل قازاقستاندا كوكتەمگى اسكەرگە شاقىرۋ ناۋقانى 1-ناۋرىزدا باستالىپ، ماۋسىم ايىنىڭ سوڭىنا دەيىن جالعاسادى. وسى ۋاقىت ىشىندە قارۋلى كۇشتەردىڭ، باسقا دا اسكەرلەر مەن اسكەري قۇرالىمداردىڭ قاتارىن 18-27 جاس ارالىعىنداعى ون جەتى مىڭعا جۋىق ءجاسوسپىرىم تولىقتىرادى.
