رەسەيلىك كومپانيالاردىڭ قازاقستانعا ينۆەستيتسياسى 17 ميلليارد دوللاردان استى - قاسىم-جومارت توقايەۆ
بۇل تۋرالى قازاقستان پرەزيدەنتى رەسەيلىك ارىپتەسى ۆلاديمير پۋتينمەن وتكەن كەزدەسۋ قورىتىندىسى بويىنشا بۇقارالىق اقپارات قۇرالدارىنا جاساعان بىرلەسكەن مالىمدەمەسىندە ايتتى، دەپ حابارلايدى قازاقپارات ءتىلشىسى.
«كارانتين شەكتەۋلەرىنە قاراماستان، بىلتىر ءوزارا ساۋدا-ساتتىقتا ەڭ جوعارى ناتيجەلەرگە قول جەتكىزىلدى. ساۋدا كولەمى 21 ميلليارد دوللاردان استى. رەسەي كومپانيالارى قازاقستان ەكونوميكاسىنداعى جەتەكشى ينۆەستورلاردىڭ بەستىگىنە كىرەدى. ولاردىڭ جالپى سالىمى 17 ميلليارد دوللاردان استى. رەسەي قازاقستانداعى شەتەلدىك كاپيتالى بار كومپانيالاردىڭ سانى بويىنشا كوشباسشى بولىپ سانالادى. ءاربىر ءۇشىنشى وسىنداي كومپانيا رەسەيلىك كومپانيالاردىڭ قاتىسۋىمەن قۇرىلعان. ولاردىڭ جالپى ينۆەستيتسيالىق پروتفەلى بۇكىل سالالاردا كورىنىس تاپقان. ءبىز وندىرىستىك كووپەراتسيانى كەڭەيتۋدىڭ كەلەشەگىن تالقىلادىق. بۇل باعىتتا ءبىزدىڭ ەلدەر 13 ءىرى جوبانى اياقتادى»، - دەدى پرەزيدەنت.
ايتا كەتەيىك، رەسەي فەدەراتسياسىنىڭ استاناسىندا ق ر پرەزيدەنتى قاسىم-جومارت توقايەۆ پەن ر ف پرەزيدەنتى ۆلاديمير پۋتين كەلىسسوز جۇرگىزدى.
مەملەكەت باسشىسىنىڭ رەسەيگە جۇمىس ساپارى اياسىندا ءبىرقاتار قۇجاتقا قول قويىلدى.
