قازاقستاندا كاسىپكەرلىكپەن اينالىسۋعا 17 مىڭنان استام گرانت بەرىلدى - ەڭبەك ءمينيسترى

«ەلىمىزدەگى بارلىق مەملەكەتتىك باعدارلامالار الەۋەتىن ەسكەرە وتىرىپ، بيىل 1 ميلليون 220 مىڭ ادامدى جۇمىسپەن قامتۋ شارالارىنا تارتۋ جوسپارلانعان بولاتىن. بۇگىندە 743 مىڭ ادام وسى شارالارعا تارتىلدى. ونىڭ ىشىندە ەڭبەك باعدارلاماسىنا 379 مىڭ ادام قاتىسۋعا نيەت ءبىلدىردى. ولارعا كاسىپكەرلىكپەن اينالىسۋعا 5800 جەڭىلدەتىلگەن نەسيە، 17200 قايتارىمسىز گرانت بەرىلدى»، - دەدى مينيستر.

ونىڭ سوزىنە قاراعاندا، قىسقا مەرزىمدى وقىتۋمەن، كاسىپكەرلىك نەگىزدەرىنە وقىتۋعا بارلىعى 34,5 مىڭ ادام قاتىسۋدا. قىركۇيەك ايىندا قوسىمشا ۇ ب ت- دان وتپەي قالعان مەكتەپ تۇلەكتەرى جۇمىسشى ماماندىقتار بويىنشا تەگىن تەحنيكالىق-كاسىپتىك وقۋعا جىبەرىلگەن بولاتىن.

«جۇمىسپەن قامتۋ ورتالىقتارى اشىق ۆاكانسيالارعا بەرىلگەن جولدامالار بويىنشا 130 مىڭ ادامعا جۇمىس تابا ءبىلدى. ەڭبەك باعدارلاماسىنىڭ وڭىرلەر بولىنىسىندە ورىندالۋىنا توقتالاتىن بولساق، 14- تامىزداعى جاعداي بويىنشا 5800 شاعىن نەسيە العان ادام قوسىمشا 6151 تۇراقتى جۇمىس ورنىن اشتى. شاعىن نەسيەلەر جۇمىستارىندا شىعىس قازاقستان، قوستاناي وبلىستارى جانە شىمكەنت قالاسى جاقسى كورسەتكىشتەرگە يە، باتىس قازاقستان وبلىسىندا بەلسەندىلىك تانىتۋ كەرەك. بەرىلگەن 17 مىڭنان استام گرانتتىڭ 51 پايىزى از قامتىلعان، كوپبالالى جانە جۇمىسسىزدارعا باعىتتالدى»، - دەدى ب. نۇرىمبەتوۆ.