قازاقپارات كۇنتىزبەسى: 17- مامىر
اتاۋلى كۇندەر
دۇنيەجۇزىلىك ەلەكتر بايلانىسى جانە اقپاراتتىق قوعام كۇنى
بۇل كۇن 1865-جىلعى 17- مامىردا العاشقى حالىقارالىق تەلەگراف كەلىسىمىنە قول قويۋ جونىندەگى كەلىسسوزدەردىڭ ءساتتى اياقتالۋىنا، سونداي-اق 1932-جىلدان كەيىن حالىقارالىق ەلەكتر بايلانىسى وداعىنا اينالعان حالىقارالىق تەلەگراف وداعىنىڭ قۇرىلۋىنا وراي تاڭدالدى.
دۇنيەجۇزىلىك گيپەرتونياعا قارسى كۇرەس كۇنى
جىل سايىن دۇنيەجۇزىلىك گيپەرتونياعا قارسى كۇرەس ليگاسىنىڭ باستاماسىمەن اتالىپ وتىلەدى. ونىڭ باستى مىندەتى - جۇرەك-قان تامىر جۇيەسىنىڭ كەڭ تارالعان اۋرۋلارىنىڭ ءبىرى تۋرالى اقپارات تاراتۋعا ىقپال ەتۋ. ول العاش رەت 2005-جىلدىڭ 14- مامىرىندا بولعان ەدى، ال 2006-جىلدان باستاپ 17- مامىردا اتالىپ وتەدى.
دۇنيەجۇزىلىك سپيد قۇرباندارىن ەسكە الۋ كۇنى
مامىر ايىنىڭ ءۇشىنشى جەكسەنبىسىندە الەم حالقى عاسىر دەرتى اتانعان اتالمىش ىندەتتىڭ قۇرباندارىن ەسكە الادى. بۇل الەمدىك قوعامداستىق نازارىن وسى اۋرۋعا جانە ا ي ت ۆ- مەن سىرقاتتانعان جاندارعا اۋدارۋ ءۇشىن جاسالۋدا. العاش رەت ج ي ت س قۇرباندارىن ەسكە الۋ كۇنى سان-فرانتسيسكو قالاسىندا 1983-جىلى اتالىپ وتەدى.
ەستە قالار وقيعالار
1936-جىلى ماسكەۋدە العاش رەت قازاق مادەنيەتى مەن ونەرىنىڭ ون كۇندىگى وتكىزىلدى.
1992-جىلى قازاقستان رەسپۋبليكاسى پرەزيدەنتى نۇرسۇلتان نازاربايەۆتىڭ تۇركيادا قازاقستاننىڭ ەلشىلىگىن اشۋ تۋرالى جارلىعى جارىق كوردى.
1992-جىلى قازاقستان پرەزيدەنتى نۇرسۇلتان نازاربايەۆ امەريكاعا العاش رەت رەسمي ساپارمەن بارىپ، سونىڭ بارىسىندا قازاقستاننىڭ يادرولىق قارۋدى تاراتپاۋ تۋرالى كەلىسىمگە قوسىلۋ مىندەتتەمەلەرىنە قول قويدى.
1992-جىلدىڭ 19- مامىرىندا ا ق ش جانە قازاقستان پرەزيدەنتتەرىنىڭ العاشقى كەزدەسۋى ءوتتى.
2007-جىلى الماتىدا ب ۇ ۇ- نىڭ ازيا جانە تىنىق مۇحيتى وڭىرىنە ارنالعان ەكونوميكالىق جانە الەۋمەتتىك كوميسسياسىنىڭ قۇرىلعانىنا 60 جىل تولۋىنا وراي شىعارىلعان ەستەلىك پوشتا ماركاسىن سالتاناتتى تانىستىرۋ ءراسىمى ءوتتى.
قازاقستان پوشتالىق اكىمشىلىگى شىعارعان كوركەم ماركادا ۇلتتىق ورنەكتەر مەن ەسكاتونىڭ 60 جىلدىعىن بىلدىرەتىن ارنايى بەلگى باسىلعان. بىرلىك نومينالى 25 تەڭگەنى قۇرايتىن بۇل ماركانىڭ جالپى تارالىمى 50 مىڭ دانا.
2010-جىلى استانادا بالالار مەن جاستار ءۇشىن «150» نومىرىندەگى تاۋلىك بويى جۇمىس ىستەيتىن تەگىن ۇلتتىق سەنىم تەلەفون جەلىسى جۇمىس ىستەي باستادى.
2012-جىلى ەلورداداعى ساكەن سەيفۋللين اتىنداعى مۇراجاي جاڭا ەكسپوناتپەن تولىقتى. حالىق كومپوزيتورى اقان سەرىنىڭ كەسەسى جۇرت نازارىنا ۇسىنىلدى. ول سول كەزگە دەيىن دارىگەر اباي بايگەنجيننىڭ جەكە مۇراعاتىندا ساقتالعان. ⅩⅩ عاسىردىڭ باسىندا شىعارىلعان فارفور بۇيىمى وسى كۇنگە دەيىن جاقسى ساقتالعان.
2013-جىلى «عارىش-ەكولوگيا» عىلىمي-زەرتتەۋ ورتالىعىنىڭ عالىمدارى عارىش زىمىراندارىن ۇشىرىلعاننان كەيىن قورشاعان ورتا وبەكتىلەرىندە زىمىران وتىنىنىڭ ۋىتتى كومپونەنتتەرىن انىقتاۋدىڭ بىرەگەي ءادىسىن جاساپ، پاتەنتتەدى. ونى جاساۋعا مۇمكىندىك بەرگەن عىلىمي-زەرتتەۋ بازاسى زىمىرانداردى ۇشىرۋ مونيتورينگى تىكەلەي جۇرگىزىلەتىن بايقوڭىر مەن جەزقازعانداعى زەرتحانالاردى، سونداي-اق موبيلدى جىلجىمالى زەرتحانالاردى قامتيدى.
2017-جىلى استانادا «رۋحاني جاڭعىرۋ» باعدارلاماسىنىڭ قۇرامداس بولىگى «تۋعان جەر» باعدارلاماسىنىڭ ساراپتامالىق كەڭەسىنىڭ العاشقى وتىرىسى ءوتتى. ساراپتامالىق كەڭەس «تاربيە جانە ءبىلىم»، «اتامەكەن»، «رۋحاني قازىنا»، «اقپارات تولقىنى» سەكىلدى ءتورت بولىمنەن تۇراتىن «تۋعان جەر» باعدارلاماسىن ىسكە اسىرۋدىڭ نەگىزگى تۇجىرىمدامالىق تاسىلدەرىن قاراستىردى.
2017-جىلى قازاقستاندىق ءانشى ديماش قۇدايبەرگەن پاريجدەگى «Global Gift Foundation» قايىرىمدىلىق كەشكى اسىنا قاتىستى. پاريجدەگى قايىرىمدىلىق كەشىنە ديماشتى گولليۆۋد جۇلدىزى، امەريكالىق اكتريسا ەۆا لونگوريا شاقىرعان.
2019-جىلى نۇر-سۇلتان قالاسىندا دۇنيەجۇزىلىك ساۋدا ورتالىعىنىڭ كاپسۋلاسىن سالۋ ءراسىمى ءوتتى، ونىڭ ماقساتى - جۇمىس ورىندارىن قۇرۋ، ساۋدا جانە ينۆەستيتسيا تارتۋ ءۇشىن جاڭا مۇمكىندىكتەر جاساۋ.
