20:44, 19 - جەلتوقسان 2019 | GMT +5
امەريكانىڭ كاليفورنيا شتاتىندا 17 جاستاعى قىز ۇشاقتى ايداپ اكەتپەك بولعان
فرەسنو. قازاقپارات - امەريكانىڭ كاليفورنيا شتاتىنداعى فرەسنو قالاسىندا بويجەتكەن قىز ۆينتتى ۇشاقتىڭ سالونىنا جاسىرىن كىرىپ كەتكەن. ول ۇشاقتى ايداپ اكەتپەك بولدى، دەپ حابارلايدى قازاقپارات NBC News-كە سىلتەمە جاساپ.
«17 جاستاعى قىز تاڭعى 7:30-دا تەحنيكالىق قىزمەت كورسەتۋ عيماراتىنىڭ دۋالىنان سەكىرىپ كىرگەن.
ول King Air 200 ۇشاعىنىڭ كابيناسىنا كىرىپ، ءبىر قوزعالتقىشتى ىسكە قوسقان»، - دەدى فرەسنو پوليتسيا باستىعى دريۋ بەسسينگەر باسپا ءسوز كونفەرەنتسياسىندا.
كەيىننەن پوليتسەيلەر ۇشقىش كابيناسىندا قۇلاققاپ تاعىپ وتىرعان قىزدى ۇستادى. ول ەشكىممەن سويلەسۋپەي قويعان.
بەسسينگەردىڭ سوزىنشە، جاسوسپىرىمگە ۇشاقتى ۇرلادى دەگەن ايىپ تاعىلادى. پوليتسيا بۇل ارەكەتتىڭ سەبەبىن انىقتاۋعا تىرىسىپ جاتىر، ءبىراق بويجەتكەننىڭ ىشكى تەرروريزمگە قاتىستى نيەتى بولماعان سىڭايلى.
بويجەتكەن ءبىر قوزعالتقىشتى ىسكە قوسقاندىقتان ۇشاق اينالا باستاعان، ءبىراق ونى اۋەگە كوتەرە الماي، جاقىنداعى عيمارات پەن دۋالعا سوعىلعان.
زارداپ شەككەندەر جوق. ۇشاققا ءبىرشاما زاقىم كەلدى.
