العاش رەت «ەرتىس» قۇرامىندا 17 جاستاعى فۋتبولشى وينادى

پاۆلودار. قازاقپارات - پاۆلودارلىق «ەرتىس» فۋتبول كلۋبىنىڭ تاربيەلەنۋشىسى ارمان كەڭەسوۆ قاراعاندىلىق «شاحتەر» كومانداسىنا قارسى ماتچتا ويىن كورسەتتى، دەپ حابارلايدى قازاقپارات ءتىلشىسى.

«مەن بۇعان 12 جىل دايىندالدىم. ماتچتىڭ ءوز جەرىمدە، تانىس مىنبەردە وتكەنىنە قۋانامىن. مەن العاشقى قۇراممەن شىعار كەزدە قاتتى تولقىدىم، اسىرەسە باستاپقى 10-15 مينۋتتا بۇل قاتتى بايقالعان بولۋى كەرەك. ودان كەيىن ءوزىمدى ەركىن ۇستاي باستادىم، ونى ءوز بەتىمشە جاساعان قيمىلداردان اڭعارۋعا بولادى»، - دەدى ارمان كەڭەسوۆ.

«پاۆلودارلىق سپورت مەكتەبىنىڭ تاربيەلەنۋشىسى ارمان كەڭەسوۆ «ەرتىستىڭ» نەگىزگى كومانداسىنىڭ قۇرامىندا قاراعاندىلىق «شاحتەرگە» قارسى ويىن كورسەتتى. جاس جارتىلاي قورعاۋشى باستاپقى كوماندانىڭ قۇرامىندا العاش رەت وينادى»، - دەدى «ەرتىس» كلۋبىنىڭ باسپا ءسوز قىزمەتىندەگىلەر.

بوزبالانىڭ سوزىنەن بەلگىلى بولعانداي، ول باپكەرلەر شتابىنا بەرىلگەن مۇمكىندىك ءۇشىن العىسىن بىلدىرەدى.

«بۇل - ەرەكشە سەزىم. مەن بۇنى جاتتىعۋلاردا ءجان-تانىممەن دايىندالعانىم ءۇشىن بەرىلگەن سىي دەپ تۇسىنەمىن. باپكەرلەرگە وسىنداي مۇمكىندىك ءۇشىن راحمەت ايتامىن. بۇل سوڭعى ويىن بولمايدى دەپ ۇمىتتەنەم. ويىن جايلى ايتار بولسام، ونى كوپ جاعدايدا ءبىز باسقاردىق»، - دەدى ا. كەڭەسوۆ.