مارك تسۋكەربەرگ ءبىر كۇندە 17 ميلليارد دوللارعا جۋىق قارجىسىنان ايىرىلدى

استانا. قازاقپارات - Facebook الەۋمەتتىك جەلىسىنىڭ نەگىزىن قالاۋشى مارك تسۋكەربەرگ Facebook Inc كومپانياسىنىڭ اكسيالارى كۇرت تومەندەۋى سالدارىنان 16,8 ميلليارد ا ق ش دوللارى مولشەرىندە زيان شەكتى. بۇل تۋرالى بەيسەنبىنىڭ تاڭىندا Bloomberg اگەنتتىگى حابارلادى.

فەيسبۋك اكسيالارى بۇرىن- سوڭدى بۇلاي قۇلدىراپ كورگەن ەمەس. نيۋ- يوركتە سارسەنبى كۇنگى ساۋدالاردىڭ قورىتىندىلارىنا وراي، جەلىنىڭ اكسيالارى 20 پايىزعا ارزانداعان.

كاليفورنيادا ورنالاسقان Menlo Park كومپانياسى وكىلدەرىنىڭ مالىمدەۋىنشە، ەكىنشى توقسانداعى تابىس ساراپشىلاردىڭ بولجامىنان ءبىرشاما از بولىپ، 13 ميلليارد دوللاردى قۇراعان. بۇدان تىس، پايدالانۋشىلاردىڭ ءبىر تاۋلىكتە فەيسبۋككە كىرۋ كورسەتكىشى دە بولجامنان تومەن بولعان.

Bloomberg اگەنتتىگى، ەگەر بەيسەنبى كۇنگى ساۋدا- ساتتىقتا Facebook Inc اكسيالارىنىڭ باعاسى كوتەرىلمەسە، سۋكەربەرگ الەمدەگى ەڭ باي ادامدار تىزىمىندەگى ءۇشىنشى ورنىنان ايىرىلىپ، التىنشى ساتىعا سىرعيتىنىن جورامالداپ وتىر.

اۆتور: نۇرلان تۇياقوۆ