قالانى الەۋمەتتىك جەلى ارقىلى باسقارعان اكىم 17 جىلعا سوتتالدى
استانا. قازاقپارات - برازيليادا بوم جارديم قالاسىنىڭ بۇرىنعى اكىمى ليديان لەيتە 14 جىلعا اباقتىعا قامالدى.
27 جاستاعى كەلىنشەك قالالىق بيۋدجەتتەن 6 ميلليون دوللاردى ۇرلاپ كەتىپ، WhatsApp ارقىلى قاراماعىنداعى قىزمەتكەرلەرگە تاپسىرما بەرىپ وتىرعان.
لەيتە ەلدىڭ سولتۇستىك باتىسىنداعى ەڭ كەدەي شتاتتاردىڭ ءبىرى مارانتيانعا 2012 - جىلى اكىم بولىپ تاعايىندالعان. بۇل قىزمەتتى وعان دەيىن ونىڭ 44 جاستاعى كوڭىلدەسى ۋمبەرتو دانتوس سانتوس اتقارىپتى. لەيتە قىزمەتىنە كىرىسكەننەن كەيىن-اق كوڭىلدەسىن كەڭەسشى ەتىپ تاعايىنداعان.
وسىلايشا ەكەۋى قالا بيۋدجەتىنە قول سالىپ، از قامتىلعان وتباسىلاردىڭ بالالارىن تاماقتاندىرۋعا بولىنەتىن قور قارجىسىن جىمقىرعان. مەكتەپتەردە تاماقتىڭ جوقتىعىنا شاعىم ايتىلا بەرگەننەن كەيىن بيلىك جاڭا اكىمنىڭ قىزمەتىنە تەكسەرىس جۇرگىزگەن.
2015 -جىلى لەيتە مەن سانتوس اجىراسىپ، سانتوس قىزمەتىنەن كەتەدى. ءبىرشاما ۋاقىتتان كەيىن لەيتەنى تۇتقىنداۋ تۋرالى شەشىم قابىلدانادى. الايدا ول سان-لۋيس قالاسىنا قاشىپ بارىپ، جاسىرىنعان. ءبىراق قاراماعىنداعى قىزمەتكەرلەرىنە قاشىقتىقتان تاپسىرما بەرىپ، پروكۋراتۋرا قىزمەتكەرلەرىمەن ارالاسۋعا تىيىم سالعان.
39 كۇننەن كەيىن كەلىنشەك ءبارىبىر ۇستالعان. تەرگەۋ ءىسى ەكى جىل بويى جالعاسقان. ونىڭ ءالى قاشىپ جۇرگەن كوڭىلدەسىنە سىرتتاي 17 جىلعا ۇكىم كەسىلگەن.
دەرەككوز: ۆەستي. Ru
