ۇشاق اپاتى: پروفەسسور ارتىقبايەۆ 17- اۆيارەيسكە شىققان

الماتى. قازاقپارات - كارديولوگيا جانە ىشكى اۋرۋلار عىلىمي- زەرتتەۋ ينستيتۋتىنىڭ قىزمەتكەرلەرى ۇشاق اپاتىنان قازا بولعان ارىپتەستەرى جانىبەك ارتىقبايەۆتىڭ وتباسىنا ماتەريالدىق كومەك كورسەتپەك، دەپ حابارلايدى قازاقپارات ءتىلشىسى.

بۇگىن دارىگەرلەر مارقۇمنىڭ قانداي مامان بولعاندىعىن ەسكە الدى. انەستەزيولوگ- رەانيماتولوگ، پروفەسسور ارتىقبايەۆ 19 - قىركۇيەكتە 60 جىلدىعىن تويلاعان. 30 جىلدىق ەڭبەگىندە مىڭداعان ادامنىڭ ءومىرىن قۇتقارىپ قالعان.

«مەنىڭ ارىپتەسىم ءوز ءىسىنىڭ مامانى بولاتىن. كۇردەلى جۇرەك وتالارى كەزىندە، جۇرەكتى توقتاتقان كەزدە دە وتا ءساتتى اياقتالاتىن. سوڭعى ۋاقىتتا ول تالىمگەرلىكپەن اينالىستى. ءوزىنىڭ تاجىريبەسىن، ءبىلىم جاستارعا مۇرا ەتىپ قالدىردى. 2015 -جىلدان بەرى ول 17 رەت اۆيارەيسپەن قاتىناعان»، - دەدى ينستيتۋت ديرەكتورىنىڭ ورىنباسارى قۇرمانعازى ماداليەۆ.

 مارقۇممەن 14 جىل قاتار جۇمىس جاساعان دوسى ءارى ارىپتەسى يسماتۋللا كامالوۆ تا قايعىلى وقيعاعا قاتىستى ويىن ءبىلدىردى. «ول تەك قانا الماتىدا عانا ەمەس، بارلىق قازاقستاندا سىيلى ازامات بولاتىن. ول ءار ىسكە مۇقيات بولاتىن. امال قانشا، وسى جولى كەستە بويىنشا جانىبەكتىڭ كەزەگى كەلدى»، - دەدى ول. ينستيتۋت قىزمەتكەرلەرى قازا بولعان ارىپتەستەرىنىڭ وتباسىنا كوڭىل ايتىپ، ماتەريالدىق كومەك كورسەتۋگە دايىن ەكەندىكتەرىن ايتتى.

اۆتور: گۇلميرا عوسمانالي