قازاقستان ازاماتتىعىن 17 جىلدان بەرى الماعان كوپبالالى انا جۇرتتان كومەك سۇرادى
ىشەرگە اسى، كيەرگە كيىمى جوق كوپبالالى وتباسى ۇلتتىق ارناعا ءوتىنىش جازىپ، جەرگىلىكتى بيلىك پەن قايىرىمدى جانداردان كومەك سۇرادى.
بۇل تۋرالى قازاقستان ارناسى حابارلايدى.
قازىر ول الماتى وبلىسى، قاراساي اۋدانىنا قاراستى جاڭاقۇرىلىس ەلدى مەكەنىندە سەگىز بالاسىمەن پاتەر جالداپ تۇرادى. ساندۋعاش تۇرمانوۆا 2000 -جىلى وزبەكستاننان وتباسىمەن بىرگە اتاجۇرتقا قونىس اۋدارادى. سول تۇستا ونىڭ قولىندا وزبەكتىڭ ەمەس، كەڭەس وكىمەتى كەزىندەگى قىزىل پاسپورت بولعان. ءبىراق سول قۇجاتپەن جاڭاوزەنگە تىركەۋگە تۇرعان. ال 2003 -جىلى ولار الماتى وبلىسىنا كوشىپ كەلگەن. ۋاقىتشا پاتەر جالداپ، التىن وردا بازارىندا ساۋدا جاساپ كۇن كورگەن.
«ودان كەيىن ول پاسپورتتى اۋىستىراتىن ەشقانداي جاعداي بولعان جوق. بالا ۇستىنەن بالا تۋىپ، ەشقانداي جاعداي جاساي المادىق. كۇيەۋىم بازاردا اۋىر جۇك تاسىدى، مەن بالامەن ۇيدە وتىردىم»، - دەيدى ساندۋعاش تۇرمانوۆا.
ول قازاقستانعا كەلگەلى 9 قۇرساق كوتەرگەن. ونىڭ بىرەۋى ءسابي كەزىندە شەتىنەپ كەتكەن. ەكىنشى پەرزەنتى ءۇيدىڭ جانىنداعى سايداعى سۋعا تۇنشىعىپ ولگەن. ال قالعان 8 بالانى باعىپ- قاعامىن دەپ ءجۇرىپ تىركەۋگە دە تۇرماعان. سودان بەرى 17 جىل وتكەن. كوپبالالى انا اتانعانىمەن ءالى كۇنگە دەيىن ازاماتتىعى جوق. سول سەبەپتى، التىن القا الماق تۇگىلى، مەملەكەتتەن بەرىلەتىن كومەكتىڭ بارىنەن قاعىلعان.
«بەسەۋىندە دە مەتەركى(تۋۋ تۋارالى كۋالىك) جوق. پەرزەنتحانادا ماعان انىقتاما دا بەرگەن جوق»، - دەيدى ول. بىلتىر جولداسى ەكەۋى بالا- شاعاسىنىڭ اۋزىنان جىرىپ ءجۇرىپ تاپقان 95 مىڭ تەڭگەسىن جەكە كۋالىگىڭدى جاساپ بەرەمىن دەگەن بەيمالىم كەلىنشەكتىڭ قولىنا ۇستاتقان. اقىرى ول الداپ سوعىپ، ۇشتى-كۇيلى جوعالعان. ەندى ەسكى قۇجاتىنان دا قاعىلىپ وتىر.
كوشى-قون پوليتسياسى بۇدان حاباردار ەكەنىن جەتكىزدى. ماماندار ولارعا ورالمان مارتەبەسىن الۋعا كومەك بەرەتىندەرىن جەتكىزدى. قازىر تىركەۋ ناۋقانى ءجۇرىپ جاتىر. ساندۋعاش بولسا قۇجات تەكسەرتۋدەن قاشىپ، ۇيدەن شىقپاي وتىر. ايتەۋىر بالالارى مەكتەپكە بارادى. بۇل دا كوڭىلگە مەدەۋ. الايدا ولاردىڭ كيەرگە كيىمى، ىشەرگە اسى جوق. اياداي بولمەدە بالالاردىڭ اش قۇرساق جۇرەتىن كەزدەرى از ەمەس.
