ەلوردالىق 17 جاسار بويجەتكەن كاراوكەدەن قالا اكىمىنىڭ كۋبوگىن جەڭىپ الدى

استانا. قازاقپارات - مەرەكە كۇنى «جاستار» سارايىنىڭ ساحناسىندا «ءبارى دە ءان سالادى» استانا قالاسى اكىمىنىڭ كۋبوگى چەمپيوناتىنىڭ فينالى ءوتتى.

ۆوكالمەن اينالىساتىن 17 جاسار قالا تۇرعىنى انەل سمايىلوۆا جەڭىمپاز اتاندى. جارىسقا كاسىپقوي انشىلەر دە، اۋەسقويلار دا قاتىستى.

بۇل تۋرالى قالالىق اكىمدىكتىڭ باسپا ءسوز قىزمەتى حابارلايدى.

چەمپيونات استانادا ەكىنشى رەت وتكىزىلىپ وتىر جانە ەلوردا كۇنىنە ورايلاستىرىلعان. جارىسقا 16 دان 75 جاسقا دەيىنگى ادامدار قاتىستى.

- كاستينگ 15 -مامىردا ءوتتى. وعان 250 دەن استام ادام قاتىستى. ونىڭ ىشىنەن ءۇش جاس ساناتىنداعى 60 ادام ىرىكتەلدى: مۋزىكالىق ءبىلىمى بار 16-30 جاستاعىلار، مۋزىكالىق ءبىلىمى جوق 16-30 جاستاعىلار جانە 31 دەن جاسى جوعارى ادامدار، - دەيدى كاراوكەدەن چەمپيوناتتىڭ قويۋشى رەجيسسەرى باقىتجان تاجەنوۆ.

بىرنەشە اپتا بويى قاتىسۋشىلار ۆوكالدان كاسىبي وقىتۋشىلارمەن جۇمىس ىستەپ، شەبەرلىك دارىستەرىنە قاتىستى. بايقاۋدىڭ ەكىنشى تۋرى 26 -ماۋسىمدا ءوتتى. ونىڭ قورىتىندىسى بويىنشا ءار توپتا 15 ادامنان 45 ادام شيرەك فينالعا جولداما الدى.

ايتا كەتەيىك، كاراوكەدەن چەمپيونات رەسپۋبليكامىزدا نيەت بىلدىرگەندەردىڭ بارلىعى قاتىسا الاتىن جالعىز بايقاۋ بولىپ تابىلادى.